Musk mohon se po largohet nga puna në qeverinë amerikane: “Lajme të rreme”

Elon Musk tha se nuk do të largohet nga roli i tij në qeveri në fund të majit, pavarësisht raporteve se është diskutuar me Trump.

Presidenti amerikan Donald Trump thuhet se u tha anëtarëve të rrethit të tij të brendshëm, se Elon Musk do të largohet nga kabineti i presidentit në “javët e ardhshme”.

Sekretarja e shtypit e Shtëpisë së Bardhë, Karoline Leavitt, tha se ishin “plehra” raportimet, transmeton Telegrafi.

“Elon Musk dhe presidenti Trump kanë deklaruar publikisht se Elon do të largohet nga shërbimi publik si punonjës i posaçëm i qeverisë, kur të përfundojë puna e tij e jashtëzakonshme në DOGE”, shtoi ajo.

Musk iu përgjigj raporteve në X: “Po, lajme të rreme”.

NBC News raportoi se Musk do të largohej në fund të 130 ditëve të tij si “punonjës i posaçëm i qeverisë”, dhe do të largohej më 30 maj.

Musk, i cili drejton Departamentin e Efikasitetit të Qeverisë, mbikëqyri shkurtime masive në qeverinë federale që kur Trump mori detyrën, me mijëra punëtorë që humbën punën e tyre gjatë procesit.

Një zyrtar i lartë i administratës i tha Politico se Musk do të mbajë një rol jozyrtar si këshilltar pas largimit nga kabineti.

Një tjetër paralajmëroi se kushdo që mendon se Musk do të heqë dorë tërësisht nga pozicioni i tij, po “mashtron veten”.

Largimi i raportuar i Musk vjen pas raporteve të gjera se njerëzit e afërt me Trump janë bërë gjithnjë e më të frustruar me shefin e Telsa javët e fundit, duke treguar për paparashikueshmërinë e tij.

Kjo dalje e mundshme shënon një ndryshim të fortë në marrëdhëniet Trump-Musk, me shumë njerëz që besuan vetëm javë më parë se pronari i Tesla-s ishte “këtu për të qëndruar”.

Në fillim të kësaj jave, Trump la të kuptohet se Musk do të largohej nga kabineti “në një moment”.

“Unë mendoj se ai është i mrekullueshëm, por gjithashtu mendoj se ai ka një kompani të madhe për të drejtuar dhe kështu në një moment do të rikthehet atje”, tha Trump.