Nesër në ora 14.00 në Qeveri takimi kokë më kokë Mickoski – Filipçe?!

Kryeministri Hristijan Mickoski nesër do të realizojë takim me liderin e LSDM-së, Venko Filipçe.

“Konform komunikimit publik dhe nismave të dërguara dhe gatishmërisë së demostruar nga dy palët, për nesër në ora 14:00 është caktuar takimi Mickoski – Filipçe. Takimi do të mbahet në Qeveri” – thuhet në njoftimin e portalit “Kurir”.

Arsimi, shëndetësia, gjyqësori, mbrojtja e ambientit jetësor dhe partizimi i institucioneve, janë pesë fushat që, sipas paralajmërimeve të liderit socialdemokrat Venko Filipçe, duhet të jenë në fokusin e takimit të liderëve.

Sipas Filipçes, tragjedia në Koçanë ka vetëdijësuar dobësitë sistematike dhe se është koha e fundit që të gjithë aktorët politik të nisin të punojnë për të mirën e vendit.

Kryeministri Mickoski potencoi se është i gatshëm për takim me Filipçen duke shtuar se temat serioze nuk duhet të jenë lëndë të spektakleve publike.

Edhe pse lideri I LSDM-së, Venko Filipçe, kishte thirrur takim liderësh nga të gjitha partitë politike parlamentare në Kuvend, mbetet e paqartë takimi I nesërm kokë më kokë Mickoski – Filipçe si dhe përjashtimi I liderëve tjerë partiak, sidomos të partive politike shqiptare.