Norvegjia prezanton taksë turistike mes rritjes së vizitorëve që kërkojnë klimë më të freskët

Norvegjia po përjeton një bum turistik ndërsa pushuesit nga e gjithë bota po kërkojnë destinacione me klimë më të freskët, duke regjistruar një rekord prej 16.7 milionë qëndrimesh gjatë natës vetëm gjatë verës së vitit 2024. Për të përballuar pasojat e mbiturizmit, qeveria norvegjeze ka përditësuar planet për një taksë të re për vizitorët, e cila synon të lehtësojë ndikimet negative te komunitetet vendore.

Ministrja e Tregtisë dhe Industrisë, Cecilie Myrseth, njoftoi se tarifa e propozuar është ulur nga pesë në tre përqind të kostos së një nate qëndrimi. Kjo taksë do të jetë fakultative dhe do të vendoset sipas gjykimit të autoriteteve lokale, të cilat mund ta përshtatin sipas sezonit dhe kërkesës.

Të ardhurat nga kjo taksë do të përdoren për projekte në shërbim të banorëve dhe vizitorëve, si mirëmbajtja e shtigjeve turistike apo ndërtimi i tualeteve publike. Megjithatë, taksa do të zbatohet vetëm për ata që kalojnë natën në akomodime zyrtare, duke përjashtuar kështu pasagjerët e lundrimeve, udhëtarët ditorë dhe kampistët në hapësira publike, të cilët kritikohen se kontribuojnë më shumë në dëmtimin e mjedisit.

Edhe pse ligji nuk është ende miratuar nga parlamenti, qeveria shpreson që ai të hyjë në fuqi që këtë verë. Megjithatë, ka kundërshtime nga disa parti politike dhe përfaqësues të industrisë së turizmit, të cilët paralajmërojnë se kjo taksë mund të frenojë ardhjet dhe të dëmtojë sektorin.

Rritja e interesit për destinacionet e ftohta në veri vjen edhe si pasojë e valëve të nxehta në vende si Italia dhe Spanja, ndërsa fenomenet si aurora boreale dhe “nokturizmi” kanë bërë që Norvegjia të kthehet në një pikë tërheqëse për turistët që kërkojnë përvoja të pazakonta natyrore.