Pas pezullimit të tarifave nga Trump, edhe BE heq kundërmasat ndaj SHBA

Bashkimi Evropian ka vendosur të pezullojë për një periudhë 90 ditore tarifat që kishte vendosur ndaj importeve të mallrave amerikane, pas njoftimit të presidenti amerikan Donald Trump, i cili pezulloi në mënyrë të përkohshme zbatimin e tarifave.

Presidentja e Komisionit Evropian, Ursula von der Leyen, njoftoi se kjo masë është një mundësi për t’i dhënë shanset e duhura dialogut dhe për të evituar përshkallëzimin e tensioneve tregtare.

Sipas raportimeve të BBC, 26 shtetet anëtare të BE-së ishin dakorduar për miratimin e masave kundërpërgjigjëse, disa orë përpara shpalljes së pauzës 90-ditore nga Trump. Komisioni Evropian kishte hartuar një plan për t’i futur këto masa në fuqi në tre faza. Faza e parë parashikonte tarifa ndaj mallrave amerikane që arrijnë në vlerën 3.9 miliardë euro dhe që importohen në BE, duke filluar nga 15 prilli.

Faza e dytë, që pritej të niste më 15 maj, do të përfshinte mallra me një vlerë 13.5 miliardë euro, dhe faza e tretë, që do të niste më 1 dhjetor, do të përfshinte 3.5 miliardë euro mallra të tjera.

Këto masa ishin një përgjigje ndaj taksave prej 25% që Presidenti Trump vendosi për çelikun dhe aluminin.

Pezullimi i tarifave për 90 ditë ofron mundësi që të vazhdojnë bisedimet për një zgjidhje të përbashkët, duke ulur mundësinë e një lufte tregtare më të gjerë mes SHBA-së dhe Bashkimit Evropian.