Pas valës së ftohtë siberiane, Maqedonia drejt motit pranveror

Pas valës së ftohtë shumë intensive që na erdhi drejtpërdrejt nga Siberia dhe solli temperatura jashtëzakonisht të ulëta për muajin prill, si dhe reshje bore në shumë vende nëpër Maqedoni (duke përfshirë edhe qytetet), tani na pret një periudhë me mot gjithnjë e më të ngrohtë, si gjatë ditës, ashtu edhe gjatë natës dhe orëve të mëngjesit. Kjo do të thotë se temperaturat minimale të mëngjesit dhe ato maksimale ditore do të jenë në rritje të vazhdueshme.

Në mëngjes, temperaturat në periudhën në vijim do të jenë pozitive në shumicën e vendeve, me përjashtim të vendbanimeve më të larta dhe maleve, duke përfshirë edhe vendet e skijimit, ku temperaturat do të mbeten negative, respektivisht disa gradë nën zero. Temperaturat maksimale ditore do të jenë gradualisht pranverore, dhe në periudhën që vjen, në shumë vende ato do të arrijnë deri afër apo rreth 15 gradë, ndërsa në disa vende do t’i tejkalojnë 15 gradë.

Në zonën e Vardarit dhe në pjesët juglindore të Maqedonisë, temperaturat do të ngjiten deri rreth apo edhe mbi 20 gradë.

Duhet theksuar se deri të shtunën, veçanërisht në zonën e Vardarit dhe në pjesët lindore, herë pas here do të fryjë erë e përforcuar deri në të fortë nga drejtimi verior dhe veriperëndimor (herë pas here me shpejtësi deri në rreth 70 km/orë). Edhe në Shkup, herë pas here do të ketë erë të përforcuar nga veriu dhe veriperëndimi, por do të jetë më ngrohtë, me temperatura që ngadalë do të afrohen deri në rreth 20 gradë, ndërsa gjatë fundjavës ato pritet t’i kalojnë edhe 20 gradët.

Përndryshe, moti do të jetë me diell dhe me vranësira të moderuara lokale, ndërsa më shumë vranësira priten nesër (e enjte, 10 prill), si dhe të shtunën (12 prill), kur pritet të ketë reshje lokale të shkurtra shiu dhe kushte për bubullima të rralla, ndërsa në malet mbi 1700/1800 metra lartësi mbidetare do të ketë reshje bore.