“Shqiptari i shumëpritur”/ Kryepeshkop Joani me kryeministrin Rama në “Flasim”: Kisha s’ka qenë asnjëherë kundër teknologjisë

Kryepeshkopi i Tiranës, Durrësit dhe gjithë Shqipërisë, Fortlumturia e Tij, Imzot Joani ishte i ftuari i radhës i kryeministrit Edi Rama në podcastin “Flasim”.

Në episodin e 13-të , i emërtuar “Shqiptari i shumëpritur”, Kryepeshkopi Joani tregoi se në vitin 1992 kontaktoi me Kryepeshkopin Anastas dhe u kthye në Shqipëri, pas qëndrimit të tij në SHBA.

“Kryepeshkopi Anastas është një tjetër figurë e ndritur në historinë e kishës sonë. Bëri të mundur rindërtimin nga gërmadhat me durim të madh dhe dashuri për Kishën e njerëzit. Përvoja që kam duke qenë me të për 32 vite e kam parë se e donte vendin dhe njerëzit. Shpeshherë në Greqi ka pasur ankesa se ishte më tepër shqiptar se sa duhet”, tregoi Imzot Joani.

Kryepeshkopi Joan u shpreh se “Kisha nuk ka qenë asnjëherë kundër teknologjisë, por teknologjia në vetvete nuk mund ta zgjidhë akthin ekzistencial”.

Kryeministri Rama tregoi njohjen e hershme me Kryepeshkopin Joan. “Ne kemi njohje shumë të vjetër dhe kemi folur për këto tema duke bërë ecejake mbrëmjeve në rrugën ‘Myslym Shyri’ deri pas mesnate. Flitet për vitet ’80 dhe as nuk mendohej që ne do të dilnim në botën e lirë dhe do të kishim lirë të praktikonim fenë. Ju kishit një fjali shumë të thjeshtë kumbuese, që unë do të bëhem prift”, tregoi ai.

Një eksperiencë shumë të thellë, por shumë të dhimbshme, Imzot Joani përshkoi edhe shërbimin e tij pranë Spitalit Psikiatrik numër 5 në Tiranë, ku para se të bëhej prift ka shërbyer si infermier.

“Mendja është gjëja më e rëndësishme e njeriut. Këta njerëz duhet të ndihmohen”, u shpreh ai.

Rama kujton se kur ecnin bashkë në rrugën “Myslym Shyri”, Joani punonte infermier në spitalin psikiatrik, ndërsa u shpreh se “Psikiatria ishte palestra në mungesë të kishës, ku ai stërviste shpirtin”.