Tragjedia në Koçan! Trajtimi i pacientëve: Nis faza e dytë dhe e tretë e mjekimit!

Drejtori i diskotekës “Pulse”, Aleksandar Karadakoski është viktima e 60-të e zjarrit tragjik të 16 marsit në Koçanë. Ai ishte për mjekim në Lituani, kurse gjatë së premtes nuk arriti t`u mbijetojë plagëve, pas cka Prokuroria Publike ndërpreu procedurën kundër tij.

Gjithcka është organizuar për transportin e trupit të pajetë të Drejtorit të diskotekës “Pulse”, Aleksandar Karadakoski, viktimës së 60-të nga tragjedia në Koçanë.

Obduksioni do të bëhet në Shkup.

Ministria e Jashtme, dje njoftoi se përmes Ambasadës së Maqedonisë së Veriut në Varshavë është në komunikim të rregullt me familjen e Karadakovskit si dhe me institucionet kompetente në Lituani.

Ministria e Shëndetësisë paralajmëroi se po përgatitet faza e dytë dhe e tretë e mjekimit të të lënduarve, pasi me çregjistrimin e pacientëve nga spitalet, përfundoi faza e parë e mjekimit të tyre.

Ekipe mjekësore dhe përfaqësues të ministrisë së shëndetësisë dje kanë vizituar Spitalin Klinik në Shtip për të parë kushtet për pranimin e pacientëve të lënduar.

Sot pritet kthimi I 6 pacientëve të rinj që janë në situatë stabile – dy nga Bullgaria, dy nga Hungaria dhe dy nga Spanja. Sipas protokolleve ata do të qëndrojnë për 24 orë në spitalet e vendit dhe më pas do të lëshohen për mjekim shtëpiak.

Autoritetet e shëndetësisë njoftojnë se jashtë vendit për mjekim mbeten vetëm 69 pacientë, prej të cilëve, fatkeqësisht 3 janë në situatë kritike dhe jostabile.