Viktimat e kafshimit të qenve përjetojnë trauma, nga edukimi deri te zvogëlimi i rrezikut të sulmeve

Dashuria për qentë ushqehet që në moshë të vogël, por sado e madhe të jetë ajo dashuri, fatkeqësisht ndonjëherë ndodh një pickim që lë pasoja. Çdo ditë mund të ndodhin disa kafshime nga qentë shtëpiak apo të rrugës, për të cilat qytetarët kompensohen nga komunat apo pronari i qenit. Disa ekspertë besojnë se është e nevojshme të ndërgjegjësohet popullata se cilat lloje të qenve është më mirë të rriten në shtëpi dhe çfarë kujdesi është i nevojshëm kur kemi të bëjmë me qen endacakë, të cilët duhet ndihmuar, por edhe kujdes nëse janë të sëmurë ose më agresivë.

Në rast kafshimi të qenit, kërkoni këshilla nga një mjek, jo opinione në internet.

Pediatrit dhe veterinerët rekomandojnë të kërkoni kujdes mjekësor për të përcaktuar llojin e dëmtimit. Ata theksojnë se është shumë e rëndësishme të ndiqni këshillat e profesionistëve të kujdesit shëndetësor dhe të mos zbatoni përvojat dhe opinionet e ndara në mediat sociale apo forumet e kafshëve shtëpiake.

Pediatri, dr. Angelço Andonovski, në një prononcim për MPB-në, tha se kohëve të fundit janë shtuar situatat në të cilat fëmijët kanë probleme pasi janë kafshuar nga qeni.

– Duhet kërkuar ndihmë sapo të shfaqen simptomat e para. Simptomat më të shpeshta te fëmijët janë pagjumësia, sjellja e keqe në shkollë dhe frika nga lëvizja në mjedisin e tyre, pikërisht sepse vazhdimisht mendojnë se do të kafshohen, shpjegon Andonovski, i cili është pjesë e ekipit të Shoqatës së qytetarëve “Otkritie” që zbaton programin për përkrahje dhe mbrojtje të viktimave të sulmit me qen.

Programi është krijuar për të mbrojtur qytetarët nga rreziqet që lidhen me sulmet nga qentë endacakë ose në pronësi, si dhe për t’u ofruar atyre mbështetje gjithëpërfshirëse për t’u përballur me pasojat e incidenteve të tilla.