Ylli i Barcelonës i thotë agjentit të tij t’ia gjejë një klub të ri në verë

Barcelona ka parë një përmirësim të ndjeshëm këtë sezon nën drejtimin e Hansi Flick, me trajnerin gjerman që ka rigjallëruar disa nga talentet dhe investimet e reja që kishin ngecur.

Shumica e përpjekjeve të Flick kanë dhënë rezultat, por përjashtimi më i dukshëm mbetet Ansu Fati.

22-vjeçari u rikthye këtë verë pas një huazimi të pasuksesshëm te Brighton & Hove Albion, ku sërish u përball me dëmtime.

Kishte optimizëm në radhët e klubit gjatë verës, me mesazhe pozitive, por një dëmtim në shputë që e mbajti jashtë pjesës më të madhe të përgatitjeve dhe fillimit të sezonit shoi shpresat.

Edhe pse mungoi një muaj mes nëntorit dhe dhjetorit, Fati ka qenë i gatshëm për pjesën më të madhe të sezonit.

Megjithatë, kjo nuk është shpërblyer me minuta në fushë.

Barcelona u përpoq ta bindte për një tjetër huazim në janar — me klube si Girona, Real Betis, Sevilla, Fenerbahçe dhe Besiktas që treguan interes.

Madje, gjatë vitit të fundit është përmendur edhe një lëvizje në Arabinë Saudite, për shkak të dëshirës së klubit për të hequr dorë nga paga e lartë e Fati, e cila zgjat edhe dy vite të tjera.

Fati refuzoi të gjitha ofertat dhe sinjalet drejt daljeve, i bindur se mund të fitonte sërish hapësira te Barça.

Por sipas Sport, ndërsa muajt kanë kaluar, ai e ka humbur atë shpresë dhe i ka dhënë udhë agjentit të tij, Jorge Mendes, të kërkojë një klub të ri për të këtë verë.

Pas zhgënjimit nga mungesa e mundësive nën Flick, Fati është tashmë i vendosur të largohet përfundimisht nga klubi dhe të nisë një kapitull të ri në karrierën e tij.

Sfidat që qëndrojnë përpara janë të mëdha: gjetja e një destinacioni që jo vetëm e kënaq lojtarin në aspektin sportiv, por edhe plotëson kërkesat financiare të Barcelonës dhe vetë Fati-t.

Edhe pse klubi është i gatshëm ta lëshojë falas, gjetja e një skuadre që mund të përballojë pagën aktuale të tij do të jetë e vështirë — sidomos kur ai ka kaluar disa sezone me pak minuta dhe formë të luhatshme.

Nëse nuk ndodh ndonjë surprizë, vera 2025 pritet të jetë momenti i ndarjes përfundimtare mes Ansu Fati-t dhe Barcelonës.