Aktivistët protestojnë para Parlamentit Evropian kundër gjenocidit të Izraelit në Gaza

Një grup aktivistësh, përfshirë deputetë, reaguan ndaj vrasjeve të palestinezëve në gjenocidin e Izraelit në Gaza duke u shtrirë dhe duke protestuar para Parlamentit Evropian (PE), raporton Anadolu.

Aktivistët u mblodhën përpara ndërtesës së PE-së në Bruksel dhe u shtrinë përtokë për të simbolizuar ata që janë vrarë në Gaza.

Edhe deputetët që dhanë mbështetje ndaj aktivistëve, mbajtën në duar pankarta me mbishkrimet “Ndaloni gjenocidin” dhe kefije të lyera me të kuqe që simbolizonin gjakun, ndërkohë brohoritën slogane të tilla si “Evropa duhet të ndërmarrë veprim”.

Deputetja franceze Manon Aubry tha për Anadolu se “Mesazhi që duam të japim është se nuk ka më kohë për të folur, është koha për veprim dhe jemi të lodhur dhe mërzitur. Nuk mund ta durojmë më faktin që Bashkimi Evropian (BE) vetëm flet, por nuk ndërmerr veprime për çështjen e Gazës”.

“Protesta që kemi bërë sot simbolizon se mijëra, miliona jetë palestineze janë në rrezik dhe se Benjamin Netanyahu ka vendosur të shkatërrojë një popullsi të tërë”, deklaroi Aubry.

Duke vënë theksin se BE-ja ka marrë dhjetëra vendime kundër sulmeve ruse në Ukrainë, por ka heshtur për çështjen e Gazës, Aubry tha: “Presioni që kemi ushtruar për më shumë se një vit po fillon të funksionojë sepse më në fund BE-ja ka dalë me idenë e rishikimit të marrëveshjes tregtare të BE-së me Izraelin, por kjo nuk mjafton”.

“Ne nuk duam një rishikim të thjeshtë, ne duam një pezullim sepse është shumë e qartë se nuk do të bëjmë tregti me njerëz që kryejnë gjenocid”, tha ajo.