Filipçe për borxhin prej 6 miliardë euro: Çdo foshnjë do të lindë me 6.000 euro borxh

Kryetari i LSDM-së, Venko Filipçe, dha paralajmërime serioze lidhur me mungesën e transparencës për Marrëveshjen e re të huamarrjes prej 6 miliardë eurosh që po e realizon qeveria e udhëhequr nga VMRO-DPMNE.

Ai theksoi se me këtë borxh të ri, “çdo foshnjë që do të lindë gjatë 25 viteve të ardhshme, menjëherë pas lindjes do të ketë borxh prej 6.000 eurosh”. Sipas analizave të LSDM-së, borxhi publik do të tejkalojë 115% të BPV-së – “gjë që është edhe më keq se kriza greke e para më shumë se një dekade”, nënvizoi Filipçe.

Ai reagoi edhe ndaj deklaratave të paqarta të ministres së Financave.

“Është e qartë se këto marrëveshje do të jenë jotransparente dhe të mbyllura. Ministrja e Financave thotë se do të realizohen sipas Ligjit për prokurime publike, por me kompani të huaja. Ne bëmë verifikim – ligji për prokurime publike nuk do të zbatohet”, theksoi ai, duke shtuar se “VMRO-DPMNE, partia që për shtatë vite kritikonte marrëveshjet korruptive, tani vetë po krijon terren për dyshime serioze.”

“Të gjithë po e shohim se çfarë po ndodh – është e qartë se VMRO-DPMNE po e çon shtetin drejt greminës”, deklaroi Filipçe.

Kreu i LSDM-së hapi edhe një çështje tjetër të ndjeshme – pjesën politike të marrëveshjes, migracionin.

“Media serioze britanike raportojnë se vendet e Ballkanit, përfshirë edhe Maqedoninë, do të shndërrohen në qendra për pranimin e refugjatëve të padëshiruar në Britani. E kryeministri – hesht, nuk ka qëndrim”, tha Filipçe.