Greqia në krizë për punëtorët e turizmit, mbi 80 mijë vende pune bosh

Sezoni turistik në shumicën e zonave të vendit ka më se një muaj që ka filluar me premisa pozitive si kurrë ndonjëherë, por ndërsa valët e turistëve përmbytin Greqinë, të punësuarit në këtë sektor janë të paktë në numër dhe punëdhënësit janë në një garë me kohën për ti gjetur.

Në Athinë, Selanik, apo ishujt e njohur të vendit dhe zonat bregdetare, shtohen tabelat jashtë restoranteve apo hoteleve me të cilat kërkohen kuzhinierë, kamarierë dhe staf kuzhine.

Shumë pronarë janë të dëshpëruar pasi klientët shtohen , por nuk kanë personel për të përballuar punën. “Turizmi është padyshim në rritje, por grekët preferojnë të punojnë me orar zyre, nga e hëna deri të premten, 9 me 5.” – deklarojnë ata.

Vlerësohet se rreth 80.000 vende pune janë ende të pambuluara në sektorin e shërbimeve ushqimore dhe hoteleve – shtylla kurrizore e një industrie që përfaqëson 25% të PBB-së të vendit ,ndërkohë që deri në vitin 2028, sipas Ministrisë Greke të Turizmit parashikohet se vendin do ta vizitojnë 40 milionë turistë – pothuajse katër herë më shumë se popullsia e Greqisë .

Kriza për mungesën e punëtorëve në sektorin e turizmit ka filluar prej pandemisë dhe është thelluar më pas për shkak të orareve të gjata , mungesës së kontratave të punës, krizës së kostos së jetesës në vendet turistike , por edhe puna që nuk është me kohë të plotë.

Megjithëse në ishujt me vizitueshmëri të lartë, si Kreta dhe Rodos , po shtohen raportimet për hotele e restorante që premtojnë paga dhe kushte pune më tërheqëse se konkurrentët e tyre të sektorit, kreu i Federatës së Punonjësve në turizëm deklaron se ka mungesë të paprecedentë të personave të kualifikuar dhe me përvojë.

Turizmi nuk është i vetmi sektor që ndikohet nga mungesa e fuqisë punëtore. Ndërtimet dhe bujqësia gjithashtu janë goditur nga ky fenomen , në një kohë që vendi jo vetëm po përjeton probleme demografike, por ende ndjen efektet e emigrimit të më shumë se 500.000 personave – kryesisht studentë dhe profesionistë të kualifikuar – gjatë krizës ekonomike.

Për të përballuar problemin, qeveria Mitostakis po përpiqet të sjellë të punësuar nga vendet e treta duke nënshkruar marrëveshje me vende si Egjipti, Vietnami, Bangladeshi, Gjeorgjia, India dhe Moldavia.