Haradinaj: Kurti është mashtrues, nuk i ka numrat për formimin e qeverisë

Kryetari i Aleancës për Ardhmërinë e Kosovës, Ramush Haradinaj, ka akuzuar ashpër liderin e Lëvizjes Vetëvendosje, Albin Kurti, duke e quajtur “mashtrues” dhe duke thënë se ai nuk i ka numrat për të zgjedhur kryetarin e Kuvendit dhe për të formuar qeverinë e re pas zgjedhjeve të mbajtura më 9 shkurt.

Në një deklaratë për mediat, Haradinaj vlerësoi se mënyra si Kurti po vepron si deputet dhe njëkohësisht në ekzekutiv, është e papranueshme dhe “kriminale”.

“Fakti që çon dorën në Kuvend dhe merr vendim si deputet, edhe shkon e çon dorën në qeveri, besoni është kriminale. Nuk mundet deputeti që voton në legjislaturë, të votojë edhe në qeveri. Këtij po i zbulohet mashtrimi. Është mashtrues. Po i del mashtrimi. Nuk i ka numrat, prandaj po manovron. Ne i kemi dhënë zgjidhje Kosovës. I kemi premtuar votë për kandidat konsensual,” deklaroi Haradinaj.

Ai reagoi edhe ndaj një deklarate të Kurtit dhënë një ditë më parë në televizionin publik, ku ky i fundit tha se Nisma e kishte ndihmuar AAK-në ta kalonte pragun elektoral. Haradinaj ia ktheu akuzën duke përmendur se edhe Vetëvendosja ka kaluar pragun falë partnerëve të saj të vegjël.

“Besoj kjo është e njëjtë sikur të thuhet se LVV-ja e ka kaluar pragun falë Listës GUXO dhe Alternativës. Edhe kjo e jona ashtu është. Pa Alternativën, e pa Listën GUXO, as Vetëvendosje s’e kish kaluar pragun,” u shpreh Haradinaj.

Përplasjet politike mes dy liderëve vijnë në një klimë tensioni institucional, me një Kuvend të sapozgjedhur që ende nuk ka arritur të konstituohet plotësisht dhe pa një marrëveshje të qartë për shumicën qeverisëse.