Kasami: Nuk e paragjykojmë vendimin e Mickoskit për Taravarin, sonte takohemi për t’i sqaruar këto situata

Bilall Kasami nga VLEN tha se nuk e paragjykojnë vendimin e kryeministrit Hristijan Mickoski, që Arben Taravari të vazhdojë të mbetet në qeveri. Kasami tha se sonte do të takohen me Mickoskin, për të sqaruar situatën, ndërkaq theksoi se për VLEN mbetet e papranueshme që, siç thotë Kasami, dikush që bashkëpunon me BDI-në, të jetë pjesë e qeverisë.

“Ne dmth nuk e paragjykojmë qëndrimin e kryeministrit por si koalicion VLEN do të insistojmë deri në fund që çdokush që bashkëpunon me BDI-në, në këto rrethana kur BDI është në lista të zeza, kur BDI është parti që duhet të japë llogari për korrupsionin e funksionarëve të lartë të saj, nuk mund të jetë e pranueshme. Sonte kemi një takim me kryeministrin, ku besojmë t’i sqarojmë edhe këto situata. Po do të bashkëbisedojmë rreth dmth koalicionit qeveritar dhe rreth asaj që e kemi thënë se ne si koalicion kemi pasur një marrëveshje për themelim të qeverisë me VMRO-DPMNE-në dhe sigurisht në kuadër të asaj marrëveshje do ta shqyrtojmë edhe njëherë pozicionin tonë se si më tutje si koalicion VLEN në raport me kryeministrin dhe qeverinë”, tha Kasami.