Kocevski: Hetimi për rastin e Koçanit duhet të përfundojë brenda dhjetë ditësh

Hetimi për ngjarjen tragjike në Koçan duhet të përfundojë për rreth dhjetë ditë, njoftoi Prokurori Publik Ljupço Kocevski në konferencën e sotme për shtyp, pas së cilës shtoi se mbrojtja do të ketë mundësi të shqyrtojë provat. Aktakuza, sipas Kocevskit, pritet të jetë gati në mesin e qershorit.

“Kjo është e gjitha që mund të themi për momentin. Dje, sot dhe ditët paraprake, dëshmitarë dhe të dyshuar janë marrë në pyetje, janë mbledhur prova. Deri më tani, është marrë në pyetje një numër i madh dëshmitarësh, ndoshta mbi treqind. Shpresoj që prokurorët publikë do ta përfundojnë procedurën sipas planit me dinamikën”, tha ai.

Ai theksoi se puna është ende duke u zhvilluar për të mbledhur prova të reja dhe se nëse prokurorët publikë zbulojnë momente të reja, hetimi do të zgjerohet.

Në fillim të muajit, Kocevski tha se nuk ka pasur selektivitet në hetimin e tragjedisë së Koçanit dhe se që nga momenti që ka filluar hetimi, ai nuk ka marrë asnjë presion apo kërcënim të mundshëm në lidhje me mënyrën e zhvillimit të procedurave të prokurorisë.

Në zjarrin që ndodhi më 16 mars në diskotekën “Pulse” në Koçan, po atë ditë, jetën e humbën 59 persona, ndërsa më 4 prill, më 7 prill dhe 17 prill, ndërruan jetë edhe tre persona të tjerë, duke e çuar numrin total të viktimave në 62. Nga zjarri mbetën 196 të lënduar që u trajtuan brenda dhe jashtë vendit.

Një hetim është duke u zhvilluar kundër 68 individëve dhe tre personave juridikë për tragjedinë që tronditi të gjithë vendin.