Një shpërthim që do ta ndryshonte botën: Çfarë ndodh nëse India dhe Pakistani përdorin armë bërthamore?

India dhe Pakistani janë fuqi bërthamore në konflikt, secila me rreth 180 koka bërthamore. Çfarë do të ndodhte nëse konflikti përshkallëzohet deri në përdorimin e armëve bërthamore?

Shkencëtarët nga Universiteti Rutgers në SHBA kanë bërë një analizë të mundshme të pasojave të një lufte bërthamore mes Indisë dhe Pakistanit, duke paralajmëruar se një konflikt i tillë mund të ketë pasoja katastrofike jo vetëm për të dyja vendet, por për të gjithë botën.

Ekipi i studiuesve përshkruan në detaje se si mund të fillojë një luftë e tillë, sa viktima njerëzore do të shkaktojë dhe cilat do të jenë pasojat më të gjera klimatike.

Vlerësimet sugjerojnë se, në varësi të fuqisë së armëve – nga 15 deri në 100 kilotonë – numri i të vrarëve mund të arrijë nga 50 deri në 125 milionë njerëz. Përveç numrit të madh të viktimave, miliona të plagosur do të kenë nevojë për ndihmë urgjente, ndërsa shumë qytete në Indi dhe Pakistan do të shkatërrohen dhe do të bëhen të pabanueshme.

Infrastruktura e shkatërruar, nga rrjeti elektrik te sistemet e transportit dhe sektori bankar, do ta paralizojë më tej shoqërinë.

Por autorët paralajmërojnë se shkatërrimi nuk do të mbetet i lokalizuar. Shpërthimet bërthamore dhe zjarret që do të pasonin do të krijonin sasi të mëdha tymi dhe bloze që do të ngjiteshin lart në atmosferë. Ky tym do të bllokonte dritën e diellit dhe, në rastin më të keq, do të shkaktonte një ftohje globale, të ngjashme me atë që ka ndodhur gjatë disa shpërthimeve të mëdha vullkanike në histori.

Ky efekt, i njohur si “dimri bërthamor”, do të shkaktonte rënie të temperaturave në mbarë botën, reshje më të pakta dhe çrregullime serioze në bujqësinë globale. Me fjalë të tjera, edhe vendet që nuk do të goditen drejtpërdrejt nga sulmet bërthamore mund të përballen me uri, tronditje ekonomike dhe paqëndrueshmëri politike.

Shkencëtarët theksojnë se pasojat e një konflikti rajonal bërthamor do të ishin afatgjata dhe planetare. Një luftë e tillë nuk do të ishte “problemi i tyre” – në një botë ku klima është e ndërlidhur dhe tregtia globale është e brishtë, një luftë bërthamore mes Indisë dhe Pakistanit mund të shkaktojë një krizë që njerëzimi nuk e ka përjetuar kurrë më parë.

India dhe Pakistani kanë zhvilluar dy luftëra që nga viti 1947 për rajonin e Kashmirit me shumicë myslimane, të cilin të dyja palët pretendojnë tërësisht, por e kontrollojnë pjesërisht. Që nga armëpushimi i vitit 2003, të cilit të dy vendet iu përkushtuan sërish në vitin 2021, sulmet ajrore të ngjashme kanë qenë jashtëzakonisht të rralla.