OBSH: Uria në Gaza ka arritur nivele ekstreme, njerëzit po vdesin

Hanan Balkhy, Drejtoresha Rajonale e Organizatës Botërore të Shëndetësisë për Mesdheun Lindor, deklaroi se uria dhe zia e bukës kanë arritur nivele shumë të larta në Rripin e Gazës, i cili ndodhet nën sulme dhe bllokadë intensive izraelite, dhe se si pasojë e kësaj, po vdesin njerëzit.

Balkhy iu përgjigj pyetjeve të Agjencisë Anadolu në lidhje me situatën në Gaza, gjatë takimit të 78-të të Asamblesë Botërore të Shëndetësisë, organi më i lartë vendimmarrës i OBSH-së, që po mbahet në Gjenevë të Zvicrës.

Duke theksuar se situata në Gaza është shkatërruese, Balkhy tha se zonat dhe infrastruktura shumë kritike për shëndetin janë shkatërruar plotësisht.

“Njerëzit jetojnë në një mjedis shumë të vështirë për sa i përket shëndetit. Higjiena është baza e shëndetit, dhe kjo mungon në Gaza. Ekziston gjithashtu një shkatërrim në sistemin e kujdesit shëndetësor, vetëm disa spitale ofrojnë shërbim pjesërisht ose minimalisht. Ka shumë mungesë burimesh. 41 ose 42 për qind e ilaçeve thelbësore mungojnë plotësisht. Po kështu, 41 ose 42 për qind e vaksinave kryesore nuk janë në stok. Rreth 64 për qind e pajisjeve mjekësore nuk janë aspak në dispozicion”, tha Balkhy.

Ajo vuri në dukje se ka punonjës shëndetësorë jashtëzakonisht të përkushtuar në Gaza, të cilët po bëjnë më të mirën me ato që kanë në dispozicion.

Balkhy theksoi se në Gaza po shfaqen shpërthime të skuqjeve të lëkurës, pneumoni, infeksione të shumëfishta dhe çrregullime nga stresi post-traumatik, duke shtuar se e gjithë kjo ndikon negativisht tek popullata dhe se situata nuk duket e mirë.

Duke folur për vështirësitë në shpërndarjen e ndihmës humanitare, Balkhy tha:

“Kemi afërsisht 51 kamionë që presin në kufi për të shpërndarë më shumë ndihmë. Po përpiqemi të shpërndajmë atë që ndodhet në depot e OBSH-së në disa rajone. Por kemi vështirësi të mëdha për t’i sjellë 51 kamionët në Gaza. Përveç kësaj, ushqimi që ka mbërritur pas javës së 11-të të bllokadës (të vendosur nga Izraeli) nuk është i mjaftueshëm për nevojat. Në përgjithësi, uria dhe zia e bukës në Gaza kanë arritur nivele shumë të larta. Njerëzit janë tepër të dëshpëruar për të siguruar nevojat bazë ushqimore. (Për shkak të urisë) edhe fëmijët po vdesin. Ka njerëz që vdesin nga uria. Kjo është shumë e qartë. Kur njerëzit nuk hanë, ata vdesin. Njerëzit po vdesin pa ilaçe, trajtim dhe ushqim.”

Balkhy bëri të ditur se numri i të vrarëve në Gaza ka tejkaluar 54.000 dhe se numri real mund të jetë më i lartë, pasi shumë persona ndodhen ende nën rrënoja.

“Mendoj se shkatërrimi atje është përtej imagjinatës”, përfundoi ajo.