Prokuroria e pakënaqur me masën e arrestit shtëpiak! Parashtroi ankesë dhe kërkon paraburgim për ish-drejtorët e Onkologjisë

Prokuroria Themelore ka paraqitur ankesë kundër vendimit me të cilin dy ish-drejtorëve të Klinikës së Onkologjisë në vend të paraburgimit u është caktuar arrest shtëpiak.

Nga Prokuroria njoftojnë se prokurori publik është i pakënaqur me vendimin dhe ka kërkuar nga Gjykata e Apelit që ta ndryshojë masën në paraburgim efektiv, duke vlerësuar se me masë më të lehtë nuk mund të sigurohet zhvillim i papenguar i procedurës penale.

Duke marrë parasysh se në dy aktakuzat e paraqitura, të akuzuarit ngarkohen për vepra të rënda penale për të cilat parashikohen dënime të larta me burg, si dhe rrethana të tjera që tregojnë rrezik për arratisje, masa e arrestit shtëpiak nuk përbën mbrojtje të mjaftueshme dhe efektive, thuhet në njoftimin e Prokurorisë së Shkupit.