Refuzuan rekrutimin ushtarak/ Arresohen rreth 50 mijë ukrainas në tentativë për tu larguar nga vendi ilegalisht

UKRAINË- Më shumë se 49,000 njerëz janë arrestuar në Ukrainë për përpjekje për t’u larguar nga vendi duke kaluar ilegalisht kufirin që nga vendosja e gjendjes së jashtëzakonshme në vitin 2022 për shkak të pushtimit rus, njoftoi sot roja kufitare.

Burrat ukrainas të moshës 18 deri në 60 vjeç e kanë të ndaluar të largohen nga vendi, me disa përjashtime.

Ata që duan t’i shpëtojnë rekrutimit ushtarak kalojnë kufirin ilegalisht, ndonjëherë duke rrezikuar jetën e tyre.

“Që nga 24 shkurti 2022, rreth 45,000 qytetarë ukrainas, burra të moshës 18 deri në 60 vjeç, janë ndaluar nga Shërbimi Kombëtar i Rojeve Kufitare ndërsa përpiqeshin të largoheshin fshehurazi nga vendi.

Për më tepër, rreth 4,000 persona u arrestuan për përpjekje për të kaluar kufirin nëpërmjet pikave të ligjshme të kalimit, por me dokumente të falsifikuara,” tha për AFP zëdhënësi i tij, Andriy Demchenko.

Shumica e ukrainasve që përpiqen të largohen kalojnë nëpër Transkarpati, një rajon malor dhe i pyllëzuar në kufirin me Rumaninë dhe Hungarinë, që ka qenë prej kohësh një pikë tranziti për produkte të ndryshme kontrabandë.

Që nga fillimi i pushtimit rus, Kievi është përpjekur të luftojë rrjetet e trafikantëve të paligjshëm.

Në janar, policia njoftoi se kishte kryer rreth 600 kontrolle për të arrestuar ata që ndihmuan “qindra burra” të kalonin kufirin.

Sistemi i rekrutimit ushtarak në Ukrainë, i cili është dëmtuar nga skandale, kritikohet ashpër dhe në përgjithësi konsiderohet joefikas, i korruptuar dhe i padrejtë.

Për shkak të skandaleve, Presidenti Volodymyr Zelensky shkarkoi në vitin 2023 të gjithë zyrtarët vendorë përgjegjës për rekrutimin.