Tetë pacientë të lënduar nga zjarri në Koçan kthehen sot pas trajtimit në Turqi, Bullgari dhe Slloveni

Tetë pacientë të lënduar nga zjarri tragjik në një klub nate në qytetin e Koçanit të Maqedonisë së Veriut kthehen sot në vend pas trajtimit në Türkiye, Bullgari dhe Slloveni, njoftoi Ministria e Shëndetësisë, transmeton Anadolu.

Sipas të dhënave zyrtare, pesë nga pacientët janë trajtuar në Türkiye, dy në Bullgari dhe një në Slloveni. Në përputhje me protokollet mjekësore, pacientët do të vazhdojnë të jenë nën vëzhgim në klinika përkatëse.

Disa nga të lënduarit që janë kthyer më herët në vend tashmë kanë filluar procesin e rehabilitimit në Spitalin e Përgjithshëm në Koçan, ku po trajtohen në reparte përkatëse.

Ministria e Shëndetësisë theksoi se vazhdon të ndjekë nga afër gjendjen e pacientëve të lënduar për të siguruar trajtim optimal dhe rehabilitim të mëtejshëm.

Sipas të dhënave të fundit, 18 pacientë ende mbeten për trajtim jashtë vendit.

Zjarri në diskotekën “Puls” ndodhi më 16 mars dhe mori jetën e 62 personave, ndërsa afër 170 të tjerë u lënduan. Disa nga të plagosurit u shtruan në spitalet vendore, ndërsa të tjerë u dërguan për trajtim jashtë vendit, duke përfshirë Türkiyen.