Vdes Jose Mujica ish-Presidenti majtist i Uruguajit – i njohur botërisht për stilin modest të jetës

Ish-lideri i majtë i Uruguait, Jose “Pepe” Mujica, një figurë e njohur edhe për stilin e tij modest të jetesës, ka vdekur pasi humbi betejën me kancerin, njoftoi qeveria në Montevideo të martën.

“Me hidhërim të thellë, njoftojmë ndarjen nga jeta të shokut tonë Pepe Mujica. President, aktivist, udhërrëfyes dhe udhëheqës. Do të na mungosh shumë, mik i vjetër”, tha udhëheqësi aktual i vendit, Yamandu Orsi, në rrjetin X.

Të hënën, gruaja e Mujicas, Lucia Topolansky, tha se 89-vjeçari ishte në një fazë “terminale” të kancerit dhe po merrte kujdes paliativ.

Ish-guerili dikur njihej si “presidenti më i varfër” në botë për shkak se dha pjesën më të madhe të pagës së tij dhe drejtoi një Volkswagen Beetle të vjetër ndërsa ishte në detyrë nga viti 2010 deri në vitin 2015.

Ai gjithashtu fitoi një numër të madh ndjekësish ndërkombëtarë për qëndrimin e tij të vendosur anti-konsumerist.

Gjatë mandatit të tij, Uruguai miratoi një numër ligjesh progresive — duke legalizuar abortin dhe martesën e homoseksualëve, dhe duke u bërë vendi i parë në botë që lejoi përdorimin rekreativ të kanabisit, në vitin 2013.

Mujica ishte pjesë e rebelëve MLN-Tupamaros që zhvilluan një kryengritje gjatë viteve 1960 dhe 1970.

Edhe pse popullor, shumë uruguaianë fajësuan grupin për provokimin e grushtit të shtetit ushtarak të vitit 1973 që solli një diktaturë që zgjati deri në vitin 1985.

Mujica kaloi 12 vjet në burg gjatë asaj kohe, shumicën e të cilave në izolim.

Në janar, Mujica tha se kanceri i tij, i diagnostikuar në ezofag vitin e kaluar, ishte përhapur dhe ai do të ndërpriste trajtimin.