Acerbi tregon pse e refuzoi ftesën e Italisë

Mbrojtësi i Interit dhe Italisë, Francesco Acerbi, ka shpjeguar pse ka vendosur të mos e pranojë ftesën për t’u bashkuar me kombëtaren në ndeshjet kualifikuese për Kupën e Botës kundër Norvegjisë dhe Moldavisë që zhvillohen në qershor, duke zbuluar se ndjen se “nuk është pjesë e projektit të trajnerit”.

Acerbi, 37 vjeç, ishte përfshirë në listën e trajnerit Luciano Spalletti për dy ndeshjet që do të zhvillohen më 6 dhe 9 qershor, por trajneri konfirmoi të dielën se mbrojtësi i Interit nuk ka pranuar ftesën për t’u bashkuar me skuadrën.

Acerbi këmbëngul se vendimi i tij nuk është i lidhur drejtpërdrejt me humbjen 5-0 të Interit ndaj Paris Saint-Germain në finalen e Ligës së Kampionëve të shtunën, por për faktin se nuk ka një marrëdhënie të mirë me trajnerin Spalletti.

Ai ka lënë të kuptohet se mungon respekti nga ata që “drejtojnë grupin”, mes sugjerimeve se Spalletti fillimisht nuk e kishte përfshirë Acerbin në projektin e tij për kombëtaren.

“Pas një reflektimi të thellë, sot i kam komunikuar trajnerit se nuk do ta pranoj ftesën për t’u bashkuar me kombëtaren. Nuk është një zgjedhje që e mora lehtë, sepse veshja e fanellës së Azzurrëve ka qenë gjithmonë një nder dhe burim krenarie për mua,” shkroi Acerbi në një postim të gjatë në Instagram të dielën.

“Megjithatë, në dritën e zhvillimeve të fundit, nuk ekzistojnë kushtet për të vazhduar këtë rrugëtim për momentin. Nuk kërkoj justifikime apo favore, kërkoj respekt. Dhe nëse ky respekt mungon nga ata që duhet të udhëheqin grupin, atëherë preferoj të tërhiqem.”

Ai vazhdoi: “Nuk jam nga ata që mbahen pas një thirrjeje. Kam dhënë gjithmonë gjithçka, por nuk qëndroj atje ku nuk jam më vërtet i dëshiruar, dhe është e qartë që nuk jam pjesë e projektit të trajnerit.”

“Ky është një vendim i imi, dhe siç i thashë trajnerit mëngjesin e sotëm, nuk është përfundimtar, as i diktuar nga zemërimi, e as nga ‘depresioni’ pas humbjes në finalen e Ligës së Kampionëve. Është thjesht një nevojë për të bërë një hap prapa.”

“Uroj më të mirën për kombëtaren dhe, si shokët e mi të skuadrës, do të vazhdoj t’i mbështes me të njëjtën përkushtim që kam treguar gjithmonë në fushë.”