Armëpushimi Iran-Izrael i shpallur nga Trump në rrezik, çfarë dimë deri më tani

Vetëm pak orë pas shpalljes së një armëpushimi “të plotë dhe total” midis Izraelit dhe Iranit nga presidenti amerikan Donald Trump, tensionet në rajon kanë filluar të rikthehen, duke vënë në pikëpyetje stabilitetin e marrëveshjes.
–
Trump deklaroi të hënën në rrjete sociale se kishte ndërmjetësuar një marrëveshje që do t’i jepte fund asaj që ai e quajti “Lufta 12-ditore” midis Izraelit dhe Iranit.

Ai falënderoi të dyja palët për “guximin dhe inteligjencën” që treguan në arritjen e një zgjidhjeje.

“Mendoj se armëpushimi është i pakufizuar. Do të zgjasë përgjithmonë”, tha Trump për NBC Neës.

Por çfarë ndodhi më pas?

▪ Izraeli akuzoi Iranin për shkelje të armëpushimit

Vetëm disa orë më vonë, të martën në mëngjes, ministri izraelit i Mbrojtjes Israel Katz deklaroi se Irani e kishte shkelur marrëveshjen, dhe paralajmëroi se Izraeli do të “përgjigjej me forcë”. Një zyrtar i Forcave të Mbrojtjes të Izraelit (IDF) konfirmoi për CNN se janë kapur dy raketa të lëshuara nga Irani në drejtim të Izraelit.

▪ Irani mohoi pretendimet

Zyrtarë të lartë iranianë kanë mohuar akuzat izraelite. Një burim i sigurisë në Teheran tha për CNN se deri pas orës 07:30 të mëngjesit (me orën lokale), “asnjë raketë nuk është lëshuar drejt armikut”.

“Nëse Izraeli bën një gabim, të gjitha territoret e pushtuara do të sulmohen, njësoj si një orë para se të ndalej lufta”, paralajmëroi zyrtari iranian.

Roli i Katarit dhe reagimi ndërkombëtar
Sipas burimeve diplomatike, Katari ka luajtur një rol kyç në bindjen e Iranit për të pranuar armëpushimin. Kina gjithashtu ka përshëndetur marrëveshjen, duke shprehur shpresën për zbatimin e saj sa më shpejt.

Ndërkohë, komuniteti ndërkombëtar po vëzhgon me kujdes situatën, duke pasur parasysh që armëpushimet në rajon janë historikisht të brishta.

Më herët, SHBA kishin goditur tre objekte bërthamore iraniane, duke ngritur pritshmëri për një hakmarrje të ashpër nga Teherani. Megjithatë, Katari deklaron se ka interceptuar shumicën e raketave iraniane që synonin Bazën Ajrore Al Udeid, duke minimizuar dëmet dhe duke shmangur viktimat.

Trump falënderoi Iranin për “njoftimin e hershëm”, duke lënë të kuptohet se sulmi kishte për qëllim ruajtjen e imazhit, jo përshkallëzimin e luftës.

Pas këtij zhvillimi, vëmendja është zhvendosur në konfliktin e gjatë dhe të përgjakshëm në Gaza. Udhëheqësi i opozitës izraelite, Yair Lapid, deklaroi se tani është momenti për të mbyllur edhe atë front, duke kërkuar kthimin e pengjeve dhe përfundimin e luftës me Hamasin.

“Ata që mund të arrijnë një armëpushim me Iranin, mund të përfundojnë edhe luftën në Gaza”, thuhet në deklaratën e Forumit të Familjeve të Pengjeve dhe të Zhdukurve.