Blake Lively reagon pas fitores në gjyqin 400 milionë dollarësh ndaj Justin Baldoni

Blake Lively reagon pas fitores në gjyqin 400 milionë dollarësh ndaj Justin Baldoni

“Edhe pse rasti ndaj meje u hodh poshtë, shumë gra nuk kanë mundësinë për t’u mbrojtur”

Aktorja e famshme, Blake Lively, ka reaguar për herë të parë pasi gjykata hodhi poshtë padinë për shpifje dhe shantazh prej 400 milionë dollarësh, të ngritur nga kolegu i saj në filmin “It Ends With Us”, Justin Baldoni.

Në një deklaratë të fuqishme të publikuar në “Instagram”, 37-vjeçarja shprehu mirënjohje për 19 organizatat që u bashkuan në mbështetje të saj dhe të së drejtës së grave për të folur për sigurinë e tyre.

“Ashtu si shumë të tjera, edhe unë kam ndier dhimbjen e një padie hakmarrëse”, shkroi aktorja duke shtuar: “Edhe pse rasti ndaj meje u hodh poshtë, shumë gra nuk kanë mundësinë për t’u mbrojtur”.

Pas një viti të trazuar ligjor, ylli i “Gossip Girl”, e cila ka katër fëmijë me aktorin Ryan Reynolds, u shfaq në mbrëmjen “Tribeca Artists Dinner” në Nju Jork, duke reflektuar qetësi dhe vendosmëri.

Lively premtoi se do të vazhdojë të mbrojë të drejtën e grave për të folur, për dinjitetin dhe historinë e tyre, ndërsa falënderoi publikisht të gjithë ata që qëndruan në krah të saj, miq, ndjekës e organizata.

Blake publikoi edhe një listë të plotë të organizatave që e mbështetën ligjërisht me amicus briefs, përfshirë: “California Women’s Law Center”, “Equal Rights Advocates”, “Her Justice” dhe “Coalition Against Trafficking in Women”.

Një zëdhënës i saj theksoi se këto grupe janë bashkuar për të kundërshtuar përpjekjen e Justin Baldoni për të “shkatërruar një ligj që mbron gratë që ngrenë zërin, thjesht për të mbrojtur veten”.