Ja kush janë tre komandantët më të lartë të Iranit që u vranë nga Izraeli

Në një operacion të paprecedent, të quajtur “Luani që ngrihet”, Izraeli ka vrarë tre nga figurat më të larta të sigurisë në Iran: kreun e Gardës Revolucionare, shefin e Shtabit të përgjithshëm të ushtrisë dhe një ish-kryetar të Këshillit të Sigurisë Kombëtare, shkruan CNN, transmeton IndeksOnline.

Gjeneralmajor Hossein Salami

Si komandant i Gardës Revolucionare Islamike (IRGC), Salami ishte një nga njerëzit më të fuqishëm në Iran, duke raportuar direkt te udhëheqësi suprem, Ajatollah Khamenei. Ai ka udhëhequr IRGC që nga viti 2019 dhe ka qenë i përfshirë në operacione të brendshme dhe të jashtme, përfshirë sulmet ndaj Izraelit dhe mbështetjen për grupet militante në rajon. Nën drejtimin e tij, IRGC rrëzoi një avion pasagjerësh ukrainas në vitin 2020, duke shkaktuar vdekjen e 176 personave.

Gjeneralmajor Mohammad Bagheri

Që nga viti 2016, Bagheri ka qenë shef i Shtabit të Përgjithshëm të ushtrisë iraniane, me mbi 500,000 trupa aktive. Ai është konsideruar si figura më e lartë ushtarake në vend për planifikim strategjik dhe koordinim. Bagheri ka qenë i sanksionuar nga SHBA për mbështetje ndaj terrorizmit dhe destabilizim rajonal, dhe ka luajtur rol në ndërveprimet me forcat siriane dhe diplomatët sauditë.

Ali Shamkhani

Shamkhani ishte një nga këshilltarët më të afërt të Khameneit dhe ka shërbyer për një dekadë si sekretar i Këshillit të Lartë të Sigurisë Kombëtare. Ai luajti rol kyç në bisedimet diplomatike me Arabinë Saudite dhe në përpjekjet për të rihapur dialogun bërthamor me SHBA-në. Edhe pas largimit nga posti në vitin 2023, ai mbeti figurë me ndikim në politikën e jashtme dhe të brendshme të Iranit.

Vrasja e këtyre tre figurave mund të tronditë seriozisht strukturën ushtarake dhe aftësinë e Iranit për të reaguar ndaj sulmeve izraelite./IndeksOnline/