“Me Badenter ta votojmë këtë shpejtë e shpejtë”, Qoku: Inspektorati i Gjuhëve do të fuqizohet, do të ketë të drejtë për gjoba

Koordinatori i grupit parlamentar të VLEN-it, Bekim Qoku bëri thirrje deri tek të gjithë deputetët që të votojnë për miratimin e ndryshimeve të Ligjit për Inspektoratin për Përdorimin e Gjuhëve, me qëllim që punonjësit e Inspektoratit, të marrin pagat pas pesë muajve ngecje, përcjell TV21. Qoku thotë se me ndryshimet ligjore, Inspektorati do të jetë pjesë e Ministrisë së Drejtësisë, por do të fuqizohet pasi do të ketë të drejtë për gjoba.

“Subjektiviteti i Inspektoratit mbetet në kuadër të Ministrisë së Drejtësisë, ashtu siç mbeten të gjitha Inspektoratet me Ligjin për Riorganizimin Administrativ, që u votua me shumicën absolute, me 2/3, ku votuan edhe BDI-ja. Për hir të këtij ndryshimi të riorganizimit administrativ, ky Inspektorat është pjesë e MD-së, siç janë inspektoratet e tjera pjesë e ministrive përkatëse. Thjesht duhet një vullnet i përbashkët, me Badenter ta votojmë këtë shpejtë e shpejtë edhe t’u kalojnë rrogat këtyre punonjësve. Inspektorati pas kësaj do të fuqizohet edhe më shumë, duke i dhënë edhe të drejtën për gjoba, që nuk e ka pasur deri tani”, tha Qoku