Mickoski: Pres që të jemi ndër vendet e para në botë që do të ketë marrëveshje për tregti të lirë me ShBA-të

Pres që të jemi ndër vendet e para në botë që do të fitojmë marrëveshje për tregti të lirë me Shtetet e Bashkuara të Amerikës (SHBA). Këtë e deklaroi sot kryeministri Hristijan Mickoski para fillimit të akademisë ceremoniale me rastin e 80-vjetorit të ekzistencës së Entit Shtetëror të Statistikës, në lidhje me përshtypjet nga takimet që Ministri i Punëve të Jashtme dhe Tregtisë së Jashtme Timço Mucunski pati në Uashington ditët e fundit dhe nëse ka perspektiva për nënshkrimin e një marrëveshjeje për tregti të lirë me Shtetet e Bashkuara.

“Përshtypjet janë jashtëzakonisht të larta, dhe Mucunski është ndër shtatë ministrat e parë të jashtëm nga Evropa që u pritën në nivel bilateral nga Sekretari i Shtetit i SHBA-së Marco Rubio në Departamentin e Shtetit në Uashington. Takimi zgjati rreth 45 minuta, gjatë të cilit u theksua edhe një herë bashkëpunimi strategjik dhe rëndësia e bashkëpunimit strategjik midis dy vendeve, si dhe bashkëpunimi jashtëzakonisht i sinqertë deri më tani me administratën e presidentit Donald Trump dhe pritjet për të ardhmen”, tha kryeministri.

Ai tregoi se pritjet e tij janë pozitive në aspektin e arritjes së një marrëveshjeje për tregti të lirë me Shtetet e Bashkuara.

“Ata janë pozitivë si rezultat i takimit me Jamieson Greer, përfaqësuesin tregtar në administratën e Presidentit të SHBA-së, por edhe bisedave të mia telefonike që pata me Sekretarin e Shtetit për Ekonomi, Howard Latnick. Pres që të jemi ndër vendet e para në botë që do të marrim një lloj marrëveshjeje të tillë me Shtetet e Bashkuara”, thotë Mickoski.

Në takimin midis Mucunskit dhe Rubios, i cili u zhvillua më 29 maj, u diskutuan mundësitë për thellimin e mëtejshëm të marrëdhënieve tregtare, duke arritur një hap të rëndësishëm përpara dhe progres në uljen e tarifave dhe mundësinë e fillimit të procesit të nënshkrimit të një marrëveshjeje të tregtisë së lirë.

Sekretari i Shtetit i SHBA-së, Marco Rubio, në takimin me Ministrin e Jashtëm të Maqedonisë së Veriut, ndër të tjera, theksoi “nevojën që aleatët e NATO-s të mbështesin dhe të arrijnë pesë përqind për shpenzimet e mbrojtjes”.

Të nesërmen, më 30 prill, Mucunski u takua edhe me Përfaqësuesin e Tregtisë së SHBA-së, Jamieson Greer, në të cilin u përcaktuan hapat drejt nënshkrimit të marrëveshjes së tregtisë së lirë.