Ndërtimet e paligjshme në Çair përballen me drejtësinë – Prokuroria nis procedurat!

Qyteti i Shkupit ka bërë të ditur sot se Prokuroria Themelore Publike ka filluar një procedurë penale lidhur me ndërtimet e paligjshme në komunën e Çairit, pas një denoncimi për falsifikime të dokumentacionit zyrtar.

Sipas komunikatës zyrtare, bëhet fjalë për falsifikimin e tërë librit arkivor me numra dhe kërkesa për legalizime, në të cilin dyshohet të jetë përfshirë drejtëpërdrejt edhe ish-kryetari i komunës, Visar Ganiu. Krahas kësaj, është iniciuar edhe një procedurë tjetër për legalizime të dyshimta të objekteve ndërtimore me ndihmën e një bashkëpunëtori tjetër.

“Prokuroria Themelore Publike ka nisur procedurat pas denoncimit të parë. Deri më tani, janë dy raste të ndara ku Visar Ganiu dyshohet për përfshirje direkte në falsifikime dhe legalizime joligjore,” thuhet në deklaratën nga Qyteti i Shkupit.

Për më tepër, autoritetet lokale presin që edhe Prokuroria për Ndjekjen e Krimit të Organizuar dhe Korrupsionit të ndërhyjë në rastin e Çairit, ku – sipas tyre – vepron një “bandë e krimit të organizuar” që ka mundësuar ndërtimin e objekteve të pasigurta dhe të financuara nga “para të zeza”.

“Presim reagim urgjent ndaj këtij rrjeti që ka regjistruar objekte në emër të individëve të zakonshëm, të cilët tani janë bërë milionerë përmes legalizimeve të jashtëligjshme. Kjo është një goditje e rëndë ndaj sundimit të ligjit,” përfundon komunikata.

Hetimet pritet të thellohen në ditët në vijim, ndërsa opinioni publik po kërkon përgjegjësi dhe transparencë për një nga skandalet më serioze urbanistike në kryeqytet.