Në poligonin ushtarak Krivollak u mbajt një ditë për të ftuar të rangut të lartë në kuadër të stërvitjes ushtarake “Përgjigje e Shpejtë 2025”

Sot në poligonin ushtarak Krivolak është mbajtur dita e të ftuarve të rangut të lartë, në kuadër të stërvitjes ndërkombëtare ushtarake “Përgjigje e Shpejtë 2025”. Në të marrin pjesë pjesëtarë të ushtrive të Republikës së Maqedonisë së Veriut, SHBA-së, Republikës së Shqipërisë, Greqisë, Italisë, Malit të Zi, Britanisë së Madhe, Austrisë dhe Kosovës. Stërvitja ndërkombëtare është pjesë e stërvitjes më të madhe të NATO-s për këtë vit në tokën evropiane, “Defender 25”.

Mbi 2200 pjesëtarë të ushtrisë nga vendet pjesëmarrëse po marrin pjesë në ushtrimin e stërvitjes në poligonin ushtarak Krivollak. Gjatë ditës së sotme, para të ftuarve të shumtë, ndër të cilët edhe kryeministri Hristijan Mickoski, zëvendëskryeministra, ministra dhe të tjerë, deputetë, gjeneralë nga vendet pjesëmarrëse, ambasadorë dhe atashe ushtarakë, kryetarë komunash dhe përfaqësues të Ministrisë së Mbrojtjes dhe Shtabit të Përgjithshëm, u zhvillua stërvitja taktik në terren.

Presidentja e Republikës së Maqedonisë së Veriut dhe Komandante Supreme e Forcave të Armatosura, Gordana Siljanovska Davkova, tha se paqja nuk ka alternativë, ajo është zgjedhje e trimave, premtim i të përkushtuarve dhe obligim i secilit që e mban uniformën me nder.

“Sot këtu, në poligonin Krivollak, jo vetëm që po shkruajmë një faqe tjetër të suksesshme në historinë e ushtrisë sonë, por po konfirmojmë vendosmërinë tonë për të qenë pjesë e atyre që mbrojnë paqen si qytetërim supreme”, theksoi ajo.

Ajo shtoi se kjo stërvitje nuk është vetëm një demonstrim i fuqisë ushtarake, por një manifest solidariteti, një simbol i unitetit, një përkujtues se vetëm së bashku mund të përballemi me kërcënimet që kërcënojnë paqen dhe stabilitetin.

“Në një kohë të kërcënimeve globale të sigurisë, kur bota është e ndarë mes luftërave dhe shpresës, ushtria jonë demonstron ndërveprueshmëri, profesionalizëm dhe gatishmëri për të vepruar krah për krah me aleatët, në mbrojtje të lirisë, dinjitetit dhe të drejtave të njeriut.

Anëtarësimi ynë në NATO nuk është thjesht një formalitet politik, por një angazhim strategjik, shprehje e vullnetit dhe vendosmërisë sonë për të qenë pjesë e përgjigjes kolektive ndaj sfidave dhe dilemave bashkëkohore”, theksoi ajo.

Siguria e popullit është ligji suprem për ne, theksoi presidentja.

Ajo tha se kjo stërvitje është një mesazh që ushtritë nuk janë vetëm roje kufitare, por edhe mbrojtëse të vlerave kyçe. Është një dëshmi se shteti maqedonas, përkundër të gjitha sfidave, qëndron fuqishëm në anën e paqes, sigurisë dhe unitetit.

“Është veçanërisht e rëndësishme që kjo stërvitje përkon me 32 vjetorin e partneritetit të Gardës Kombëtare të Vermontit dhe shtetit maqedonas – simbol i miqësisë sonë të thellë, të fortë dhe afatgjatë me Shtetet e Bashkuara të Amerikës, si shtyllë e sigurisë transatlantike”, tha Siljanovska Davkova.

Ajo shprehu mirënjohjen për ushtarët trima për sakrificën, përpjekjen dhe përkushtimin e tyre dhe aleatët për mbështetjen, ndihmën, njohuritë e përbashkëta dhe vizionin e përbashkët për një të ardhme të sigurt.

“Le të jetë kjo ditë një kujtim se liria nuk është e rastësishme, por fryt i vendosmërisë ideologjike dhe i një lufte të vazhdueshme për të. Le të jetë frymëzim për çdo të ri që e sheh Ushtrinë si një vend ku shërben me ndershmëri dhe përgjegjësi, por edhe mëson se si duhet dashur dhe mbrojtur atdheu. Sot edhe një herë konfirmuam vendosmërinë tonë për të qenë në anën e paqes, por edhe për të qenë të gatshëm, nëse dhe kur është e nevojshme, ta mbrojmë atë me të gjitha forcat. Kjo është e drejta jonë. Kjo është detyra jonë.

Kjo është përgjegjësia jonë. Le të vazhdojmë të ndërtojmë një ushtri të fortë dhe të besueshme, të respektuar në Aleancë dhe të gatshme për të mbrojtur interesat e shtetit dhe popullit, por edhe interesat e përbashkëta, nënvizoi ajo.

Ministri i Mbrojtjes, Vllado Misajllovski, tha se stërvitja është një demonstrim i qartë i përkushtimit të Ushtrisë së Maqedonisë së Veriut për sigurinë kombëtare dhe rajonale, si dhe për stabilitetin e Aleancës.

“Duke planifikuar, organizuar dhe kryer këtë lloj stërvitjeje së bashku me Ushtrinë Amerikane, Komandën e Ushtrisë Amerikane për Evropë dhe Afrikë, ne po forcojmë gatishmërinë dhe ndërveprueshmërinë e NATO-s midis aleatëve tanë dhe partnerëve tanë. Në këtë mënyrë, ne po përmirësojmë aftësitë tona parandaluese dhe mbrojtëse dhe po forcojmë planet tona të sigurisë kombëtare dhe të mbrojtjes dhe planet e mbrojtjes të Aleancës, shtoi ai.

Ai tha se suksesi i sotëm është rezultat i përkushtimit dhe punës së çdo pjesëtari të Ushtrisë.

“Përveç kësaj, stërvitja është gjithashtu një konfirmim i fortë i gatishmërisë së pjesëtarëve të grupit të deklaruar të Batalionit të Lehtë të Këmbësorisë në pritje të vlerësimit të ardhshëm në vitin 2026. Si vend pritës i stërvitjes, dëshiroj të theksoj rëndësinë dhe pozitën strategjike të terrenit tonë stërvitor Krivolalk, i cili është një objekt unik stërvitor me aftësi për të kryer ushtrime në shkallë të gjerë, Misajllovski.

Shefi i Shtabit të Përgjithshëm të Armatës së Republikës së Maqedonisë së Veriut, gjeneralmajor Sasko Lefçiski, u shpreh i kënaqur me ngjarjen dhe tha se në kushtet e një realiteti kompleks gjeopolitik, kjo stërvitje synon të demonstrojë një dislokim dinamik të forcave në Evropë, të nevojshme për parandalim dhe rritje të mbrojtjes. Në këtë kontekst, shtoi ai, nevoja për veprim të përbashkët është më e madhe se kurrë. Ai theksoi se ky është një ushtrim që do të dërgojë një mesazh të fortë.

“Së bashku jemi më të fortë dhe më të aftë për të mbrojtur vlerat demokratike, paqen dhe lirinë”, theksoi Lefçiski.

Ai shprehu falënderim për besimin që na është dhënë për të qenë organizatorë të kësaj stërvitje, siç theksoi, jashtëzakonisht të rëndësishme. Ai gjithashtu falënderoi për profesionalizmin e të gjithë pjesëmarrësve në stërvitje.

I kënaqur me profesionalizmin e pjesëmarrësve në aktivitetet e stërvitjes u shpreh edhe zëvendëskomandanti i Gardës Kombëtare të SHBA-së, gjeneralmajori Levon Kampton. Ai vlerësoi përkushtimin dhe gatishmërinë e tyre.

“Dua të shpreh mirënjohjen tonë të jashtëzakonshme për Maqedoninë e Veriut, për përkushtimin e saj mbresëlënës dhe të palëkundur ndaj paqes dhe sigurisë rajonale. Maqedonia e Veriut nuk është thjesht dhe vetëm një aleat i NATO-s, ju jeni një partner i vlefshëm i sigurisë si rajonale ashtu edhe globale. Angazhimi juaj për sigurinë kolektive është vërtet për t’u lavdëruar”, nënvizoi ai.

Siç u theksua, qëllimi i stërvitjes është të përmirësojë aftësitë ushtarake të aleatëve, ndërveprueshmërinë e aleatëve dhe partnerëve dhe nëpërmjet demonstrimit të gatishmërisë së lartë, të ndikojë në parandalimin e çdo lloj aktiviteti keqdashës nga kundërshtarët e mundshëm.

U theksua se ky event është shembull i bashkëpunimit të suksesshëm ndërkombëtar, i cili shkon përtej parametrave klasikë ushtarakë dhe kalon në fushën e prosperitetit dhe stabilitetit afatgjatë rajonal.

Ndërkohë, dje në Kavadar është organizuar Dita e hapur e Armatës së Republikës së Maqedonisë së Veriut dhe u bë prezantimi i stërvitjes ushtarake “Reagimi i Shpejtë 2025”.

Në sheshin e qytetit u ekspozuan mjete të blinduara, mjete luftarake, armë dhe mjete mbrojtëse. Popullata pati mundësinë të shikonte mjetet e blinduara, armët dhe mjetet mbrojtëse.