Në sulmin izraelit ndaj palestinezëve që kërkonin ndihmë në Gaza vriten 24 njerëz

Bëhet e ditur se 24 persona u vranë nga ushtria izraelite pasi hapi zjarr ndaj palestinezëve që kërkonin ndihmë humanitare në jug të Rripit të Gazës, transmeton Anadolu.

Ushtria izraelite ka shënjestruar përsëri civilët palestinezë që luftojnë me urinë në Rripin e Gazës, ku ka shkaktuar një katastrofë humanitare.

Sipas një deklarate nga Ministria e Shëndetësisë në Gaza, 24 persona u vranë dhe shumë të tjerë u plagosën kur ushtria izraelite shënjestroi palestinezët që prisnin ndihmë humanitare në zonën e shpërndarjes së ndihmave në zonën Al-Alam në qytetin Rafah.

Numri i të vdekurve nga sulmet e ushtrisë izraelite që synuan palestinezët në qendrat e shpërndarjes së ndihmave në Gaza është rritur në 76.

– Mekanizmi i “shpërndarjes së ndihmës” i Izraelit

Që nga 27 maji, ushtria izraelite ka nisur sulme ndaj zonave të shpërndarjes së ndihmave të krijuara nga “Fondacioni Humanitar i Ndihmës për Gazën”, udhëhequr nga Izraeli dhe SHBA-ja, nën maskën e ndihmës humanitare. Forcat izraelite po hapin zjarr ndaj civilëve që po mblidhen në pikat e shpërndarjes që kanë ngritur në të ashtuquajturat “zona tampon”.

Më 1 qershor, ushtria izraelite sulmoi palestinezët që përpiqeshin të merrnin ndihmë humanitare në dy pika të ndara në Rripin e Gazës, duke rezultuar në vdekjen e 32 personave dhe plagosjen e 232 personave.

Ushtria izraelite ka mohuar vrasjen e dhjetëra palestinezëve duke hapur zjarr ndaj tyre teksa prisnin ndihma në një pikë shpërndarjeje në Rripin e Gazës.

Komisioneri i Përgjithshëm i Agjencisë së Ndihmës dhe Punës së Kombeve të Bashkuara për Refugjatët Palestinezë në Lindjen e Afërt (UNRWA), Philippe Lazzarini, deklaroi se “shpërndarja e ndihmave në Rripin e Gazës është bërë një kurth vdekjeprurës”.