Pas kaosit urbanistik në Çair, edhe Tetova në të njëjtën situatë (VIDEO)

Pas problemeve me ndërtime pa leje dhe kaos urbanistik në Çair, duket se edhe Tetova po përballet me një situatë të ngjashme. Mbrëmë, disa qytetarë nga një lagje e Tetovës njoftuan policinë, pasi dikush kishte hapur një gropë ndërtimi pranë ndërtesave të tyre. Ata dyshojnë se në atë vend po ndërtohet një objekt i ri shumëkatësh, i cili do t’i bllokojë tërësisht hyrjet dhe rrugët përreth banesave ekzistuese.

Banorët për TS u shprehen të shqetësuar se në rast të ndonjë fatkeqësie, si zjarr apo emergjencë mjekësore, ndihma nuk do të mund të arrijë deri te ndërtesat e tyre, pasi rruga është e bllokuar. Sipas tyre, askush nuk e di se kush po ndërton, çfarë po ndërtohet, dhe nëse objekti ka leje ndërtimi apo jo.

Përgjegjësinë, banorët ia hedhin Komunës së Tetovës dhe kërkojnë sqarim se si është e mundur që dikush të ndërtojë pa plan urbanistik dhe pa leje të qarta. Ata kanë paralajmëruar se do të kërkojnë përgjegjësi nga kryetari i komunës, Bilall Kasami, dhe nuk përjashtojnë mundësinë e radikalizimit të protestave nëse situata nuk zgjidhet./TS/