Revizioni: ELEM TURS në RMV me humbje të mëdha dhe kapacitete të vjetruara

Enti Shtetëror i Revizionit ka publikuar analizë të pasqyrave financiare dhe operacioneve të ELEM TURS DOOEL Shkup për vitin 2023, duke arritur në përfundimin se ka probleme serioze financiare dhe menaxheriale.

Sipas auditorëve, kompania po përballet me humbje të akumuluara prej rreth 1.2 miliardë denarësh dhe borxhe që tejkalojnë 268 milionë denarë.

Raporti thekson se kapacitetet e vjetëruara të akomodimit, shpenzimi joracional i fondeve dhe menaxhimi joadekuat dëmtojnë seriozisht stabilitetin e kompanisë.

Shqetësuese është mungesa e sigurimit të pronës dhe aseteve, si dhe angazhimi i tepërt i shërbimeve të jashtme me pagesa mbi kontratat e parashikuara.

Shumica e kapaciteteve të ELEM TURS janë teknikisht të vjetëruara dhe nuk plotësojnë kërkesat minimale për akomodim, dhe disa prej tyre, siç është Resorti Shën Stefan në Ohër, nuk funksionojnë për shkak të ndërprerjes së energjisë elektrike.

Edhe pse kompania ka humbjen më të vogël në gjashtë vitet e fundit, gjendja e saj financiare mbetet seriozisht e dëmtuar, dhe borxhi i saj është vazhdimisht në rritje.