YouTube rrit kufirin e moshës për transmetuesit në 16 vjeç

Shërbimi i videove YouTube rrit kufirin minimal të moshës për transmetuesit në 16 vjeç, njoftoi kompania.

Bëhet e ditur se që nga 22 korriku, krijuesit do të duhet të jenë 16 vjeç ose më të vjetër për të transmetuar në platformë pa mbikëqyrjen e të rriturve.

Më parë, YouTube kërkonte që fëmijët nën moshën 13 vjeç të shoqëroheshin nga një i rritur nëse donin të postonin përmbajtje të drejtpërdrejtë, por në të ardhmen ky rregull do të zbatohet për të gjithë ata midis moshës 13 dhe 15 vjeç, shkruajnë mediat e huaja.

YouTube paralajmëron se kushdo nën moshën 16 vjeç që vazhdon të transmetojë pa praninë e një të rrituri pas 22 korrikut do ta ketë të çaktivizuar bisedën e drejtpërdrejtë, ndërsa qasja në funksionet e tjera do të bllokohet përkohësisht.

Pas kësaj, transmetimet që shkelin rregullat do të hiqen.

Krijuesit nën moshën 16 vjeç që dëshirojnë të vazhdojnë transmetimin e drejtpërdrejtë do të jenë në gjendje t’i japin një të rrituri qasje në kanalin e tyre si redaktor, menaxher ose pronar, gjë që do t’u lejojë atyre të transmetojnë nga llogaria e lidhur me kanalin e tyre.

Më parë, kjo duhej të bëhej përmes Live Control.

Të rriturit që bashkëkrijojnë përmbajtje me krijues nën moshën 16 vjeç do të duhet të jenë “të pranishëm” dhe të marrin pjesë qartë dhe në mënyrë të barabartë në transmetim.