Aksident tragjik në Kërçovë: Humb jetën një 17-vjeçar

Më 4 korrik 2025, rreth orës 15:26, në kryqëzimin e rrugëve “Boris Kidriq” dhe “Mirko Mileski” në Kërçovë, ka ndodhur një aksident i rëndë trafiku mes një automjeti “Audi” me targa të Kërçovës, i drejtuar nga A.E. (22) nga fshati Strellc, dhe një motoçiklete “Hamachi” që drejtohej nga një djalë 17-vjeçar nga Kërçova.

Sipas MPB-së, motoçiklisti pësoi lëndime të rënda trupore dhe u transportua menjëherë drejt klinikës “Nëna Terezë” në Shkup. Fatkeqësisht, ai ndërroi jetë gjatë rrugës si pasojë e plagëve të marra. Vdekja u konstatua nga mjekët e Ndihmës së Shpejtë.

Në vendin e ngjarjes u kryen hetime nga ekipet policore dhe një prokuror publik, i cili ka urdhëruar kryerjen e autopsisë për zbardhjen e plotë të rastit.

Ngjarja ka tronditur opinionin publik në Kërçovë, duke rikthyer në vëmendje nevojën për kujdes të shtuar në trafik, sidomos tek të rinjtë.