Kina përfundon brezin e pengesave për kufizimin e shkretëtirës së saj të katërt më të madhe

Kina arriti të hënën një moment historik në kontrollin e shkretëtirëzimit, duke përfunduar një brez pengesash përgjatë skajit juglindor të shkretëtirës Tengger në Rajonin Autonom Ningxia-Hui në Veriperëndim të vendit.

Në fshatin Changliushui, në varësi të qytetit Zhongwei, punëtorët vendosën rreshtin e fundit të kuadrateve të kashtës, një metodë tradicionale e fiksimit të rërës, që bllokon zgjatimin e fundit të dunave ranore në pjesën e Ningxia-s të shkretëtirës Tengger, pas një projekti të kontrollit të rërës që ka zgjatur më shumë se gjashtë dekada.

Kjo metodë tradicionale e fiksimit të rërës përfshin nguljen e kashtës në një model kuadrati në sipërfaqen e shkretëtirës për të stabilizuar rërën dhe për të parandaluar gërryerjen prej erës. Ky zhvillim i ri shënon përfundimin e një brezi të gjelbër 153 kilometra të gjatë në Ningxia, me një gjerësi nga 10 deri në 38 kilometra.
Kjo metodë, e njohur si projekti i bllokimit të skajeve të shkretëtirës, u krijua për të kontrolluar dunat e lëvizshme duke mbjellë breza bimësie rreth kufirit të shkretëtirës, për të ndaluar zgjerimin e mëtejshëm. Kontrolli i rërës shpesh përballet me pengesa, pasi dunat e ngulitura mund të fillojnë të lëvizin përsëri.

Brezi shërben si një vijë mbrojtëse natyrore kundër përhapjes drejt lindjes të shkretëtirës Tengger, e cila shtrihet afërsisht 43 000 kilometra katrorë.

Zhongwei, që gjendet midis maleve Qilian dhe Helan, është porta e vetme për zgjerimin e shkretëtirës Tengger drejt Lindjes. Ekspertët thonë se pengesa do të bëhet një zonë tampon kritike ekologjike që ndalon zgjerimin e mëtejshëm të rërës dhe mbron Lumin e Verdhë.

Lu Qi, kryeshkencëtar në Akademinë Kineze të Pylltarisë, tha se brezi i pengesave mund të ndihmojë në parandalimin e hyrjes së mëtejshme të shkretëtirës në tokat bujqësore, qytete, oaza dhe rrugë, e gjithashtu të zvogëlojë dukshëm burimin e stuhive të rërës.