Meta fshin 10 milionë profile false dhe rrit masat kundër përmbajtjes së rreme dhe të krijuar nga AI

Kompania Meta njoftoi se ka fshirë rreth 10 milionë profile false gjatë gjysmës së parë të vitit 2025, që pretendonin të ishin krijues të mëdhenj përmbajtjeje, si pjesë e përpjekjeve për të luftuar “përmbajtjen spam”, raportoi CNBC.

Masat janë pjesë e një iniciative më të gjerë për ta bërë ushqimin e lajmeve në Facebook më të rëndësishëm dhe autentik, duke ndërmarrë veprime kundër llogarive që përfshihen në sjellje të rreme ose përdorin përmbajtje të krijuar me inteligjencë artificiale.

Meta paralajmëroi gjithashtu masa më të rrepta për të promovuar postimet origjinale nga krijuesit realë. Janë marrë masa edhe kundër rreth 500,000 llogarive, të identifikuara si përhapëse të spam-it, përmes uljes së shikueshmërisë së komenteve dhe shpërndarjes së përmbajtjes së tyre, për të vështirësuar monetizimin e tyre.

Meta shtoi se tani posedon teknologji që zbulon videot e kopjuara dhe ndalon përhapjen e tyre, duke përmirësuar filtrimin e përmbajtjeve jo origjinale.

Kjo vjen në kohën kur Meta po rrit investimet në AI – CEO Mark Zuckerberg paralajmëroi plane për të shpenzuar qindra miliarda dollarë në ndërtimin e një superklastri kompjuterik për inteligjencën artificiale që do të lançohet vitin tjetër.

Edhe platformat e tjera po ndjekin këtë shembull. YouTube ndryshoi politikën këtë muaj për të ndaluar monetizimin e përmbajtjeve të prodhuara në masë ose të përsëritura. YouTube sqaroi se kanalet që përdorin AI për të përmirësuar tregimin e historive mbeten të përshtatshme për monetizim – për sa kohë përmbajtja është origjinale dhe jo spam.