Mexhiti nga Haraçina: Po investojmë atje ku është pritur për vite me radhë!

Zëvendëskryeministri i parë i Qeverisë dhe ministër për Mjedis Jetësor dhe Planifikim Hapësinor, Izet Mexhiti, sot vizitoi Haraçinën me rastin e përfundimit të projektit për “Rregullimin e një pjese të kanalit anësor në Haraçinë”. Projekti është tërësisht i financuar nga buxheti i Ministrisë për Mjedis Jetësor dhe Planifikim Hapësinor me një vlerë prej 63,9 milionë denarësh.

Kjo ndërhyrje strategjike përmirëson derdhjen e ujërave atmosferike për mbi 12.600 banorë, rrit sigurinë e vendbanimeve dhe mbron sipërfaqet bujqësore nga përmbytjet – jo vetëm në Haraçinë, por edhe në komunat fqinje.

“Erdha këtu jo vetëm për të shënuar përfundimin e një projekti, por për të konfirmuar se Haraçina mbetet në fokusin e politikave tona. Do të vazhdojmë me edhe më shumë investime që nënkuptojnë kushte më të mira jetese për të gjithë banorët e kësaj komune që për vite të tëra ka pritur projekte të tilla kapitale,” deklaroi ministri Mexhiti.

Pjesa e rregulluar e kanalit anësor, në gjatësi prej 295 metrash, i kthen funksionin natyror kanalit. Ky kanal, që më parë ishte i mbuluar me vegjetacion dhe i bllokuar nga mbeturinat, tani ka një kapacitet të ri rrjedhjeje, duke minimizuar rrezikun nga përmbytjet sezonale.

Përveç këtij projekti, Ministria për Mjedis Jetësor dhe Planifikim Hapësinor vetëm gjatë muajve të fundit ka investuar edhe 93 milionë denarë shtesë në afro 20 projekte për furnizim me ujë, kanalizim dhe mbrojtje nga përmbytjet në Haraçinë. Këto përfshijnë ndërtimin e kanalizimit atmosferik dhe fekal në disa rrugë të fshatit, rregullimin e shtratit të lumit në Mojancë, Grushinë dhe Orllancë, si dhe ndërtimin e shtigjeve për këmbësorë, trotuareve dhe rregullimin e hapësirave publike.

“Po ashtu, edhe përmes Ministrisë së Transportit dhe Lidhjeve janë realizuar ndërhyrje të rëndësishme infrastrukturore – vetëm kohët e fundit janë rikonstruktuar rrugë dhe rrugica lokale me një vlerë mbi 53 milionë denarë, gjë që dëshmon përkushtimin e Qeverisë ndaj Haraçinës,” theksoi Mexhiti, dhe përfundoi:

“Ne, si Ministri për Mjedis Jetësor dhe Planifikim Hapësinor, do të vazhdojmë të investojmë atje ku nevojitet më shumë – që çdo komunë të jetë një vend me kushte cilësore për jetë dinjitoze. Zhvillimi nuk guxon të njohë dallime gjeografike – çdo qytetar meriton mbështetje, investime dhe një mjedis të pastër jetësor.”