Mickoski: Institucione të mëdha financiare të interesuara për hekurudhën e Korridorit 10
Kryeministri Hristijan Mickoski, duke iu përgjigjur një pyetjeje të deputetëve lidhur me investimet kapitale dhe marrëveshjen për partneritet strategjik me Mbretërinë e Bashkuar, theksoi se ekziston interes serioz nga institucione të mëdha financiare për të financuar projektin kapital për ndërtimin e hekurudhës nga Korridori 10, në kushte të favorshme.
“Më lejoni të ju informoj se si po zhvillohet ky projekt dhe cili është thelbi i këtij projekti. Shkurt thënë që puna më e madhe të na lehtësohet është se Mbretëria e Bashkuar garanton për ne përpara institucioneve të huaja financiare për mjetet financiare që do t’i marrim si kredi për të realizuar këto projekte. Do të jetë surprizë e këndshme për qytetarët dhe shpresoj që edhe për opozitën, sepse në fund të ditës, ata nuk duhet ta ndërtojnë politikën e tyre mbi parimin ‘sa më keq për Maqedoninë, aq më mirë për LSDM-në’. Kur është mirë për qytetarët, është mirë edhe për opozitën, sepse në thelb bëhet fjalë për një bashkësi të përbashkët interesi.
Sa i përket projektit të parë, që është ndërtimi i hekurudhës si pjesë e Korridorit 10, tashmë jemi në fazën e analizës së ofertave financiare që kanë mbërritur. Për mua, kur kompani amerikane të rangut më të lartë, kompani franceze, gjermane, japoneze, koreane, austriake dhe britanike nga tregu financiar japin ofertë për të financuar një projekt në Maqedoni, kjo është një ditë e bukur për të gjithë ne dhe duhet të gëzohemi, sepse janë kompani të mëdha, jo periferike,” tha kryeministri Mickoski.
Ai theksoi se këto banka kanë shprehur interes të jenë pjesë e këtij paketi me kushte që deri tani nuk kanë qenë të pranishme në vendin tonë. Për shkak të zgjedhjeve lokale, këto procese do të ngadalësohen, por është formuar një komitet ndërsektorial që do t’i analizojë ofertat e pranuara dhe sipas kryeministrit, do të zhvillohen negociata bilaterale, ku oferta më e mirë do të ketë mundësinë ta financojë këtë projekt.
“Këtu nuk përfundon procedura. Hapi i radhës është përzgjedhja e kompanisë apo kompanive që do ta realizojnë këtë në terren, sipas parimit të dialogut të konkurrueshëm. Ne nuk do ta fshehim këtë nga opinioni, gjithçka do të jetë transparente dhe nuk kemi aspak për qëllim të fshehim ndonjë gjë nga opinioni,” tha Mickoski.
“Kryeministri theksoi se Ministria e Shëndetësisë do t’i kërkojë Ministrisë së Financave të sigurojë mjete për financimin e projektit për përfundimin e spitalit klinik në Shtip, ndërtesës së re për Fakultetin e Mjekësisë në Shtip dhe konviktit studentor me 200 shtretër, ndërtesës së re të spitalit në Kërçovë me Shtëpi të shëndetit, si dhe për rikonstruksionin e spitalit klinik në Tetovë. Sipas paralajmërimeve, presim që shumica e këtyre kompanive që u ofruan për hekurudhën të financojnë edhe këtë projekt të dytë,” theksoi Mickoski.
Për projektin e tretë – ndërtimin e hidrocentraleve Çebren dhe Galisht analizohet nëse ato do të ndërtohen përmes huamarrjes nga kjo pako dhe të jetë 100% në pronësi të shtetit, ose të mobilizohet kapital privat, për çka ka interes dhe ai investitor të krijojë një kompani të përbashkët me EMV-në.
“Disa kompani kanë shprehur interes për të formuar një kompani të përbashkët me EMV-në, ku EMV do të marrë një ‘pjesë’, por pa Tikveshin, pra pa atë pajë. Flas për Çebrenin dhe Galishten, ata do ta ndërtojnë të gjithë projektin, ndërsa EMV do të ketë një përqindje të caktuar të pronësisë, do të shohim se sa dhe që ky të jetë një projekt që mobilizon kapital privat,” tha Mickoski, duke shtuar se po punohet në mënyrë aktive që kompanitë maqedonase të përfshihen në ndërtimin e këtyre investimeve kapitale.
Të dy projektet e përcaktuara duhet të mobilizojnë midis 2 dhe 2.5 miliardë euro nga korniza prej 6 miliardë, por Qeveria njëkohësisht është e kujdesshme dhe po analizon që të mos rritet borxhi neto.