Mickoski: Pres një vit të suksesshëm për vreshtarët – këtë vit çmimi blerës i Smederevkës dhe Vranecit do të arrijë rekord të ri

Kryeministri Hristijan Mickoski, gjatë vizitës së sotme në Muzeun e rinovuar mbi Ujë në Gjirin e Kockave në Ohër, duke iu përgjigjur pyetjeve gazetareske, dha qëndrimin e tij lidhur me çmimet blerëse të rrushit dhe situatën në sektorin e vreshtarisë.

“Vitin e kaluar, kur e formuam Qeverinë, ministri i bujqësisë së bashku me blerësit dhe prodhuesit zhvilluan një sërë takimesh dhe u arrit çmimi më i lartë për Vranecin dhe Smederevkën edhe pse kishte një prodhim të kufizuar. Vitin e kaluar, mendoj se ishin rreth 75 milionë kilogramë. Kjo ndodhi ashtu sepse nuk kishte mjaftueshëm ujë, sistemet e ujitjes nuk ishin të mirëmbajtura dhe u përballëm me paga të papaguara për punonjësit në Ndërmarrjen Publike për Ekonominë e Ujërave. Këtë vit, sipas informacioneve me të cilat disponoj, situata është shumë më ndryshe. Prodhimi duhet të arrijë, jo deri te ato rekordet prej 150 deri në 200 milionë kilogramë, por duhet të shkojë diku te 100 deri në 110 milionë kilogramë dhe sipas të dhënave që kam, çmimi do të jetë pak më i lartë se ai i vitit të kaluar për blerjen e Vranecit dhe Smederevkës. Përsëri do të thyhet një rekord i ri, prandaj pres një sezon të suksesshëm për vreshtarët”, theksoi kryeministri Mickoski.