Polici që siguronte kryeministrin Mickoski ulet në bankën e të akuzuarve – akuzohet për nxjerrje të sekretit zyrtar për 50 mijë euro

Polici që siguronte kryeministrin Mickoski në bankën e të akuzuarve – akuzohet për nxjerrje të sekretit zyrtar për 50 mijë euro

Angel Samarakov, punonjës policie nga Drejtoria e Gjashtë që siguron personalitetet VIP dhe që deri vonë ka qenë sigurimi personal i kryeministrit Hristijan Mickoski, sot është ulur në bankën e të akuzuarve në Gjykatën Penale të Shkupit. Ai akuzohet për nxjerrje të sekretit zyrtar ndaj një personi që në procedurë paraqitet si dëshmitar – Blagoja Korunoski.

Sipas prokurores Ivana Trajçeva, më 30 mars 2025 rreth orës 23:00, në parkingun para hotelit “Gardenija” në Veles, Samarakov si zyrtar i Ministrisë së Brendshme i ka dorëzuar dëshmitarit Korunoski dokumente konfidenciale, me qëllim që këto t’i publikojë në rrjetet sociale. Për këtë, ai pritej të merrte 50 mijë euro nga një person me emrin Lelita Trajkovska Milenkova.

Samarakov nuk e pranoi fajësinë, ndërsa avokati i tij, Ivica Efremov, theksoi se do të provojnë se klienti i tij nuk i ka kryer veprat për të cilat akuzohet, duke vënë në dyshim ligjshmërinë e provave të prokurorisë dhe faktin që dokumentet përbëjnë sekret zyrtar.

Dëshmitari Korunoski aktualisht ndodhet jashtë vendit, kështu që dëshmia e tij u shty për në gusht. Prokuroria propozoi dy video incizime si prova, një nga nata kritike dhe një tjetër nga një periudhë tjetër. Gjithashtu janë paraqitur prova materiale si telefona, laptopë dhe hard disqe të analizuar.

Në sallën e gjyqit ishte edhe bashkëshortja e Samarakovit, Sanja Samarakova, ish-kandidate e VMRO-DPMNE-së për këshilltare në komunën e Velesit. Samarakov punon në MPB që nga viti 2015, nuk është i dënuar më parë dhe ka përfunduar Fakultetin Juridik me provimin e jurisprudencës të kaluar.