Shqiptarët përbëjnë mbi 36% të lindjeve në Maqedoninë e Veriut

Sipas të dhënave më të fundit statistikore për vitin 2023, 36.23% e të gjitha lindjeve të foshnjave të gjalla në Maqedoninë e Veriut i përkasin komunitetit shqiptar.

Ky tregues demografik konfirmon një trend të qëndrueshëm që ka zgjatur më shumë se tri dekada, ku lindshmëria ndër shqiptarët mbetet mbi një të tretën e totalit të lindjeve në vend. Sipas ekspertëve, kjo përqindje mbart domethënie të rëndësishme për strukturën etnike të popullsisë në të ardhmen.

Shifrat i referohen vetëm lindjeve të regjistruara brenda territorit të Maqedonisë së Veriut, duke ofruar një pasqyrë të qartë të natalitetit aktual sipas përkatësisë etnike.

Ky zhvillim demografik shihet gjithashtu si një indikator i rëndësishëm për projeksionet afatgjata të përbërjes së popullsisë dhe për çështje të ndjeshme si përfaqësimi, ndarja e resurseve dhe të drejtat kolektive në një shtet multietnik.