Shtetas zviceran filmonte fëmijë të zhveshur në ishullin kroat Rab, arrestohet nga policia

Zyrtarët policorë nga stacioni policor në Rab arrestuan një shtetas zviceran 65-vjeçar nën dyshimin se në një plazh në vendin Lopar kishte filmuar fëmijë të zhveshur me telefon celular dhe me aparat fotografik. Burri u arrestua të premten rreth orës 16:00, pas një telefonate nga qytetarët.

Policia, sapo mbërriti në plazh, e gjeti të dyshuarin dhe e ndaloi me përdorim force në ambientet e stacionit policor. Bazuar në një urdhër të lëshuar nga gjykata kompetente, u krye kontroll në pajisjet e tij – telefonin celular, aparatin fotografik, laptopin dhe automjetin personal.

Pas përfundimit të hetimeve penale, 65-vjeçari iu dorëzua mbikëqyrësit të paraburgimit, nën dyshimin se ka kryer veprën penale “eksploatim i fëmijëve për pornografi”, për të cilën është paraqitur kallëzim penal, njoftoi policia.