Sot interpelanca ndaj kryeprokurorit Ljupço Kocevski

Në seancën e 64-t të Kuvendit të Maqedonisë së Veriut që po mbahet sot, pritet të konstatohet dorëheqja e kryetares së Komisionit Shtetëror për Parandalimin e Korrupsionit. Megjithatë, vëmendja më e madhe është përqendruar në pikën tjetër të rendit të ditës – interpelanca për punën e Prokurorit Publik Republikan, Ljupço Kocevski, e paraqitur nga partia opozitare E Majta, përcjell INA.

Seanca drejtohet nga kryetari i Kuvendit, Afrim Gashi, i cili pas një periudhe të shkurtër mungese për shkak të problemeve shëndetësore, për herë të parë rikthehet sot në krye të punimeve parlamentare.

Interpelanca ndaj Kocevski është argumentuar nga “E Majta” me pretendimin se ai nuk ka respektuar detyrimet kushtetuese dhe ligjore që i takojnë funksionit të tij. Kjo nismë ka ngjallur reagime të ndryshme në skenën politike dhe ka ndarë partitë parlamentare në qëndrime të kundërta.

“E Majta” ka paralajmëruar mbështetje të plotë për interpelancën që vetë e ka paraqitur, ndërsa Lidhja Social Demokrate e Maqedonisë (LSDM) është shprehur kundër saj. Kryetari i lëvizjes ZNAM, Maksim Dimitrievski, ka deklaruar se deputetët e kësaj force politike do ta mbështesin interpelancën ndaj Kocevskit. Partia më e madhe opozitare, VMRO-DPMNE, ende nuk ka dalë me një qëndrim të qartë, por kryeministri Hristijan Mickoski, i cili është edhe lider i kësaj partie, në një deklaratë për mediat ka lënë të kuptohet se nuk pritet ndonjë ndryshim i papritur në qëndrimin e tyre. “Publiku do ta shohë nesër. Si parti politike dhe unë personalisht nuk i ndryshoj qëndrimet brenda natës,” tha Mickoski gjatë një vizite në komunën e Kisella Vodës.

Ndërkohë, Bashkimi Demokratik për Integrim (BDI) ka paralajmëruar se qëndrimin përfundimtar do ta bëjë publik gjatë ditës së sotme.

Debati për interpelancën ndaj Kocevskit vjen në një periudhë të ndjeshme politike dhe institucionale për vendin, me sfida të shumta në luftën kundër korrupsionit dhe funksionimin e drejtësisë. Vendimi që do të merret sot në Kuvend pritet me interes të madh nga opinioni publik dhe do të jetë një tregues i qartë për pozicionimet e partive politike ndaj institucioneve kyçe të drejtësisë në vend.