80 vite nga Hiroshima: bota përkulet përpara hijes së bombës atomike

Në Hiroshimë, në pjesën perëndimore të Japonisë, sot u shënua 80-vjetori i hedhjes së bombës së parë atomike mbi qytet – sulmi më vdekjeprurës me armë bërthamore në histori. Ceremonia përkujtimore nisi saktësisht në orën 08:15 të mëngjesit me kohën lokale – momenti kur bomba shpërtheu më 6 gusht 1945.

Me një minutë heshtje, vendosje kurorash me lule dhe fjalime nga përfaqësues të lartë shtetërorë, iu dha nderimi 140.000 viktimave që humbën jetën nga shpërthimi shkatërrues. Vetëm tre ditë më vonë, më 9 gusht, një tjetër bombë atomike u hodh mbi Nagasaki, duke shkaktuar edhe 70.000 vdekje të tjera. Japonia kapitulloi më 15 gusht, duke shënuar kështu fundin e Luftës së Dytë Botërore.

Këto bombardime, të cilat e detyruan Japoninë të dorëzohej, mbeten rastet e vetme në histori kur armë bërthamore janë përdorur në një konflikt lufte. Meqenëse mosha mesatare e të mbijetuarve nga bombardimet (të njohur si “hibakusha”) tashmë ka kaluar 86 vjet, ceremonia e sivjetme konsiderohet si një nga mbledhjet e fundit madhore të dëshmitarëve të tragjedisë.

“Po na mbaron koha dhe përballemi me kërcënimin bërthamor më të madh ndonjëherë,” deklaroi organizata japoneze e të mbijetuarve, Nihon Hidankyo, fituese e Çmimit Nobel për Paqe vitin e kaluar për përkushtimin ndaj çarmatimit bërthamor. Ata shtuan: “Sfida jonë më e madhe tani është të ndryshojmë qëndrimin e shteteve me armë bërthamore, të cilat na trajtojnë me indiferencë.”

Në ceremonitë e Hiroshimës morën pjesë përfaqësues nga mbi 100 shtete, përfshirë kryetarin e bashkisë Kazumi Matsui dhe kryeministrin japonez Shigeru Ishiba. Ata vendosën kurora me lule dhe mbajtën fjalime përkujtimore në Parkun Memorial të Paqes.

Përveç liderëve politikë, familjarë dhe të mbijetuar filluan të mblidheshin që në orët e hershme të mëngjesit, për të ndezur qirinj dhe për t’u përkulur para kujtimit të ditës më të errët në historinë e qytetit të tyre.