Aleanca për Shqiptarët: Mexhiti u zhduk kur u dogjën pyjet – ministër i bizneseve, jo i mjedisit jetësor

Aleanca për Shqiptarët shpreh shqetësimin e thellë për gjendjen alarmante të mjedisit jetësor në Maqedoninë e Veriut gjatë këtij viti, kur vendi u përball me qindra vatra zjarri që për gati katër muaj rrezikuan hapësirat e gjelbra, vendbanimet dhe jetët e qytetarëve. Në këtë krizë natyrore, u mobilizua edhe Mekanizmi i Mbrojtjes Civile i Bashkimit Evropian, për të ndihmuar shtetin tonë në përballjen me pasojat katastrofale të zjarreve.

Ajo që ra më së shumti në sy ishte mungesa totale e përgjegjësisë dhe angazhimit nga ana e ministrit të Ambientit Jetësor dhe Planifikimit Hapësinor, Izet Mexhiti, i cili në asnjë moment nuk u shfaq në terren për të parë nga afër situatën dramatike, e as nuk ndërmori ndonjë masë konkrete për t’i dalë zot qytetarëve dhe natyrës.

Mexhiti, gjatë gjithë kësaj kohe, zgjodhi të luajë rolin e gjykatësit, prokurorit dhe liderit politik, por jo rolin për të cilin është betuar në Kuvend – atë të ministrit që ka për detyrë mbrojtjen e mjedisit jetësor.

Heshtja e tij ishte edhe më skandaloze në rastin e shkatërrimit të malit Kozhuf, ku kompania në pronësi të biznesmenit Gjoko Sterjoski, pronar i rrjetit të kazinove dhe bastoreve “Sportlife”, shkatërroi mijëra metra katrorë pyje për interesa të ngushta financiare, duke dëmtuar biodiversitetin dhe rrezikuar seriozisht ekosistemin dhe cilësinë e jetës në të gjithë rajonin. Ministri Mexhiti nuk e pa të arsyeshme as të reagojë, e aq më pak të ndërmarrë masa për mbrojtjen e natyrës dhe përgjegjësinë ligjore ndaj kompanive të këtilla.

Përkundrazi, ministria që ai udhëheq është bërë makineri për shpërndarjen e lejeve për shfrytëzim të burimeve natyrore të vendit, duke u vënë hapur në shërbim të interesave të ngushta të një grupi biznesmenësh dhe jo të qytetarëve dhe komunitetit.

Për Aleancën për Shqiptarët është e qartë se aty ku ka interes financiar privat, aty gjendet Izet Mexhiti. Aty ku kërkohet përgjegjësi, sakrificë dhe shërbim ndaj qytetarëve, Mexhiti është i zhdukur.

Mjedisi jetësor nuk mund të jetë pronë private e një individi apo grupi të vogël biznesmenësh. Heshtja dhe neglizhenca e ministrit Mexhiti përballë zjarreve shkatërrimtare dhe përballë krimeve ekologjike në Kozhuf janë dëshmi se ai ka braktisur detyrën për të cilën është votuar dhe betuar.

Aleanca për Shqiptarët kërkon përgjegjësi institucionale dhe politike për këtë sjellje të papërgjegjshme, duke paralajmëruar se qytetarët nuk do të harrojnë neglizhencën e ministrit Mexhiti ndaj natyrës, mjedisit jetësor dhe shëndetit publik.

Aleanca për Shqiptarët