Arabia Saudite synon të kthehet në qendër financiare rajonale, sfidon Dubain

Pas vonesash shumëvjeçare, Distrikti Financiar i Mbretit Abdullah (KAFD) në Riad po merr më në fund jetë, duke u pozicionuar si projekti kryesor i Arabisë Saudite për të rivalizuar qendrat financiare të rajonit si Dubai dhe Abu Dhabi. Që prej vitit të kaluar, Fondi Sovran i Investimeve (PIF) ka zhvendosur stafin e tij në kullën më të lartë të kryeqytetit (385 metra), ndërsa kompani ndërkombëtare si HSBC dhe Accenture kanë hapur zyra në distrikt.

Autoritetet saudite kanë vendosur rregulla që detyrojnë kompanitë globale të hapin seli rajonale në mbretëri, me të paktën 15 punonjës, përndryshe rrezikojnë të humbin kontrata qeveritare. Deri tani, mbi 600 kompani kanë marrë licenca për selitë e tyre në Riad, përfshirë banka të mëdha si Goldman Sachs dhe Morgan Stanley, edhe pse shumë të tjera mbeten hezituese për shkak të pasigurisë rregullatore.

Me gjithë këtë, Arabia Saudite po shfrytëzon fuqinë financiare të PIF për të tërhequr kapital ndërkombëtar. Fondi ka arritur marrëveshje me menaxherë të mëdhenj asetesh si BlackRock dhe Franklin Templeton, ndërsa së fundmi ka nisur një platformë investimesh prej 6 miliardë dollarësh në Riad.

Reformat sociale si lejimi i grave për të ngarë makinën dhe hapja e sektorit të argëtimit po synojnë ta bëjnë jetën në Riad më tërheqëse për profesionistët e huaj. Megjithatë, sfida të tilla si mungesa e shkollave, strehimi i shtrenjtë dhe ndalimi i alkoolit mbeten pengesa, ndërkohë që Dubai vazhdon të ketë një përparësi të qartë infrastrukturore dhe rregullatore.

Arabia Saudite e sheh projektin KAFD si simbol të përpjekjes për të diversifikuar ekonominë nga nafta dhe për ta pozicionuar veten si fuqinë financiare kryesore të rajonit.