BDI: Korrupsioni i fshehur në zemër të Komunës së Çairit (VIDEO)

Bashkimi Demokratik për Integrim shpreh shqetësim për gjendjen e rëndë me korrupsionin në Komunën e Çairit.

Mijëra euro që janë nga taksat tona, para të qytetarëve të zakonshëm, janë ndarë sistematikisht për kafiterinë ‘1sh’, në pronësi të zëvendësministres së Transportit, Kaltrina Zekolli-Shaqirit. Kjo ndarje është bërë pa asnjë shpallje publike, vetëm me marrëveshje “sy-më-sy”, duke thelluar edhe më tepër korrupsionin dhe abuzimin me pushtetin.

Në vitin 2024 vetëm kjo kafiteri nga Komuna e Cairit ka marrë mbi 14 416 euro përmes kontos së reprezentacionit dhe ka pasur ditë kur shuma për një ditë ka kaluar edhe 2 000 euro.

Klienti më i rregullt i këtij lokali në vitet e fundit ka qenë stafi nga Komuna e Çairit. Shuma të mëdha parash janë harxhuar në “1sh” nën arsyetimin e shërbimeve me kafe dhe ushqim të shpejtë, në mënyrë jotransparente dhe pa konkurrencë.

Kujtojmë se Ligji për prokurime publike është i qartë: çdo shërbim që tejkalon 1 000 euro duhet të kalojë përmes procedurës transparente dhe konkurruese të tenderit. Kjo ka ndodhur në mënyrë flagrante në favor të një biznesi që lidhet ngushtë me njerëzit e pushtetit.

Më tej, për katër vite e gjysmë, lokali ‘1sh’ ka inkasuar rreth 30 000 euro nga buxheti i komunës.

Ky rast është tipik për nepotizëm përmes afërsisë politike: pronarja është në partinë e Izet Mexhitit, pjesë e Lëvizjes Demokratike, si dhe bashkëpartiake e kryetarit aktual të komunës.

Kjo sjellje sfidon parimet bazë kushtetuese dhe ligjore si transparenca, konkurrenca e barabartë, dhe integriteti institucional. Kur institucioni i komunës përdoret për përfitime klienteliste, kur pronari në fjalë është funksionar i lartë shtetëror, nuk kemi të bëjmë me shërbim publik, por me kapje shtetërore.

Sot, kërkojmë:

Hetim të plotë dhe transparencë nga autoritetet përgjegjëse.

Procedura të rrepta për përjashtimin e bizneseve me konflikt interesi dhe për zbulim të menjëhershëm të skemave të tilla.

Qytetarë, nuk është vetëm çështje e një biznesi të privilegjuar është sfidë për demokracinë dhe të ardhmen e vendit tonë.

Të bashkangjitur ua dërgojmë linkun: