BDI nxjerr një skandal të madh: Në Komunën e Çairit, 600 persona marrin çdo muaj paushalle mujore prej 15.000 deri 50.000 denarë

Bashkimi Demokratik për Integrim sot ka ngritur alarmin për një tjetër skandal të madh në Komunën e Çairit, i cili sipas tyre, përfaqëson një vjedhje të drejtpërdrejtë të parave të qytetarëve.

Sipas të dhënave të prezantuara në konferencën e sotme për shtyp, brenda një muaji janë paguar mbi 600 paushalle mujore me shuma nga 15.000 deri 50.000 denarë. Këto mjete, siç theksoi Besarta Alija nga BDI, shpërndahen pa kritere, pa shpjegim dhe pa sistem merite dhe përfundojnë kryesisht tek aktivistët partiakë që kryejnë punët politike të Izet Mexhitit.

“600 persona marrin drejtpërdrejtë paushalle mujore nga paratë e qytetarëve, vetëm për të shtyrë agjendën partiake të Izet Mexhitit. Pyetja është e thjeshtë: a janë këta njerëz të ngarkuar të bëjnë fushatën e tij me para nga buxheti i Komunës së Çairit?”, deklaroi Besarta Alija.

BDI bëri thirrje që Komisioni Shtetëror për Parandalimin e Korrupsionit dhe Prokuroria të hapin urgjentisht procedurë dhe të hetojnë se ku përfundojnë mes 300.000 dhe 500.000 euro çdo muaj.

“Kjo është shpërdorim pa precedent. Qytetarët e Çairit kanë të drejtë të dinë kush dhe si i shpenzon paratë e tyre. Mjaft më me gënjeshtra dhe manipulime. Çairi meriton pushtet të ndershëm dhe llogaridhënës”, theksoi Alija në konferencën për shtyp.