“Manipulim, fyerje dhe diskreditim publik” — Reagim i ashpër dhe frontal i analistit Qani Shabani ndaj publicistit Shkëlzen Maliqi pas deklaratës kundër Kryeministrit në detyrë, Albin Kurti!

Shkruan :Analisti Qani shabani

Në një reagim të publikuar fillimisht në llogarinë e tij në Facebook, e më pas të shpërndarë edhe nga Gazeta Express, opinionisti Shkëlzen Maliqi ka hedhur një varg akuzash të rënda në drejtim të Kryeministrit në detyrë, Albin Kurti. Në këtë koment të ngarkuar me emocione dhe gjuhë përçmuese, Maliqi shpreh dyshime mbi ligjshmërinë e Kurtit si deputet dhe si Kryeministër në detyrë, duke e etiketuar si “qeratai” dhe duke pohuar se ai është “praktikisht person non grata” për Bashkimin Evropian dhe Shtetet e Bashkuara të Amerikës.

Deklarata të tilla, të bëra nga një figurë që ka pasur një rol të gjatë në jetën publike dhe debatin intelektual në Kosovë, nuk mund të kalojnë pa një reflektim të thelluar dhe pa kundërpeshë publike. Ato janë simptomatike për një degradim të standardit të diskutimit politik dhe për rrezikun që bart kur personalitetet publike i japin ton fyes dhe të padenjë komunikimit me qytetarët.

Së pari, përdorimi i termit “qeratai” për një Kryeministër në detyrë është jashtë çdo etike publike dhe institucionale. Është një etiketim me natyrë ofenduese, i papranueshëm në një debat civil dhe i padenjë për një opinionist që pretendon të flasë në emër të arsyes politike apo së drejtës demokratike.

Së dyti, shprehja “person non grata” është një term diplomatik teknik, me kuptim të qartë dhe pasoja të përcaktuara ndërkombëtarisht. Për ta përdorur këtë term në një mënyrë kaq të lirshme dhe të pakonfirmuar nga ndonjë deklaratë zyrtare, Maliqi jo vetëm që shtrembëron realitetin, por ndikon negativisht në perceptimin publik dhe në imazhin institucional të Republikës së Kosovës. Një përfaqësues i një shteti mund të jetë subjekt i kritikave politike ose diplomatike, por shpallja si “non grata” kërkon një akt formal dhe publik nga një shtet i caktuar — gjë që nuk ekziston në këtë rast.

Së treti, funksionimi i institucioneve dhe statusi i bartësve të funksioneve kushtetuese vendoset nga Kushtetuta e Republikës së Kosovës dhe nga aktet përkatëse ligjore, jo nga statuset në Facebook apo nga opinione të individualizuara, sado të vjetra apo të zëshme që të jenë. Albin Kurti, për aq kohë sa Kuvendi dhe Gjykata Kushtetuese nuk thonë të kundërtën, është Kryeministër në detyrë dhe deputet në përputhje me ligjet në fuqi.

Së fundi, është thelbësore të kujtojmë se kritika është e mirëseardhur në një shoqëri demokratike, por ajo duhet të jetë e bazuar, e përgjegjshme dhe e artikuluar me dinjitet. Fyerjet dhe gjuhët përçmuese nuk e ndihmojnë demokracinë, përkundrazi: ushqejnë krizën e përfaqësimit, përçajnë opinionin dhe e degradojnë kulturën e debatit politik në vend.

Në një kohë kur Kosova ka nevojë për lidership institucional të qëndrueshëm, për bashkëpunim me partnerët ndërkombëtarë dhe për forcim të besimit qytetar në shtet, është detyrë morale dhe profesionale që zërat me ndikim të respektojnë peshën e fjalës së tyre dhe të kontribuojnë në ndërtim, jo në rrënim.