Partey lirohet me kusht nga akuzat për përdhunim, gati të bashkohet me klubin e madh të La Ligës

Ish-mesfushori i Arsenalit, Thomas Partey, është liruar me kusht pas paraqitjes së tij në Gjykatën e Westminster në Londër të martën, ku ai u përball me pesë akuza për përdhunim dhe një akuzë për sulm seksual.

Ganezi 32-vjeçar, i cili është në prag të nënshkrimit të një kontrate dyvjeçare me skuadrën e La Ligas, Villarreal, i mohoi të gjitha akuzat përmes avokates së tij, Jenny Wiltshire, e cila deklaroi se “e mirëpret mundësinë për të pastruar më në fund emrin e tij” pas një hetimi tre-vjeçar.

Akuzat, të ngritura nga Policia Metropolitane më 4 korrik 2025, katër ditë pasi skadoi kontrata e Partey me Arsenalin, lidhen me incidente që dyshohet se përfshijnë tre gra midis viteve 2021 dhe 2022.

The Telegraph raporton se sipas dokumenteve të gjykatës, dy akuza për përdhunim kanë të bëjnë me një grua, tre akuza për një tjetër, dhe një akuzë për sulm seksual përfshin një të tretë, me incidente të raportuara në Londër dhe një hotel spanjoll.

Partey, i cili bëri 130 paraqitje në Ligën Premier për Arsenalin, duke shënuar nëntë gola, ka qenë nën hetim që nga shkurti i vitit 2022, me arrestimin e tij të parë në korrik të atij viti.

Pavarësisht procedurave ligjore në vazhdim, Partey është gati të vazhdojë karrierën e tij me Villarrealin, pasi ka kaluar testet mjekësore dhe ka rënë dakord për një kontratë njëvjeçare me opsion edhe për 12 muaj shtesë, i motivuar nga kualifikimi i tyre në Ligën e Kampionëve.